Тоқаев Алатау қаласының арнайы режимі туралы айтты
Президент Қасым-Жомарт Тоқаев Астанада өткен барлық деңгейдегі мәслихат депутаттарының форумында Алатау қаласы туралы пікір білдірді.
Мемлекет басшысы қалаға қатысты арнайы режимді еске салып, оның мазмұны тек қаржылық басқаруға, салықтық преференцияларға және капитал тарту үшін қажетті сот рәсімдеріне қатысты екенін айтты.
Тоқаевтың сөзінше, Конституцияда арнайы құқықтық режимді бекіту инвесторлар үшін қолайлы жағдай жасауға бағытталған. Ол Қазақстанның әлемге өзін тұрақты, ашық және кедергілерден азат, ішкі нарықтағы жағдайы ашық мемлекет ретінде көрсететінін атап өтті.
Президент мұндай аумақтар алдағы уақытта да Қазақстанның біртұтас конституциялық және құқықтық кеңістігінің ажырамас бөлігі болып қала беретінін жеткізді.
Сондай-ақ ол елдің аумақтық тұтастығы мен мемлекеттік құрылысының мызғымас екенін атап өтті.
Бұдан бөлек, Тоқаев өз сөзінде жаңа Конституция мәтінімен жұмыс істеген барлық азаматтарға тағы да алғыс білдірді.
