ІІМ орынбасары Санжар Әділов Нұрай Серікбайдың өліміне қатысты тергеудің аяқталуға жақын екенін айтты
Ішкі істер министрінің орынбасары Санжар Әділов Нұрай Серікбайдың өліміне қатысты қылмыстық іс бойынша тергеу барысын түсіндірді. Оның айтуынша, тергеу әрекеттері аяқталуға жақын.
Әділовтің нақтылауынша, іс бойынша сот-психиатриялық сараптама тергеушінің тағайындауымен жүргізіліп, нәтижелері қазірдің өзінде алынған.
"Тергеушінің тағайындауымен сот-психиатриялық сараптама жүргіздік, қазір нәтижелері алынды. Ол заң алдында есі дұрыс адам ретінде жауап береді", — деді Әділов.
ІІМ-де барлық қажетті рәсімдер аяқталғаннан кейін іс бойынша түпкілікті процессуалдық шешім қабылданатыны қосылды.
Күдікті психиатриялық ауруханада
Бұған дейін 21 жастағы Нұрай Серікбайдың өліміне қатысты істің жайттары белгілі болған. Жәбірленуші тараптың ақпаратына сәйкес, күдікті СИЗО-дан Алматы облысы, Ақтас ауылындағы мамандандырылған психиатриялық ауруханаға ауыстырылған.
Отбасының адвокатының айтуынша, 28 жастағы ер адамға бірқатар сараптама тағайындалып, өзі мамандардың бақылауымен интенсивті ем қабылдап жатыр. Оның есі дұрыстығы жөніндегі түпкілікті шешім ол кезде әлі қабылданбаған.
Марқұмның туыстары күдікті психикалық дертті симуляциялау арқылы қылмыстық жауапкершіліктен жалтаруға тырысуы мүмкін екенін айтып, алаңдаушылық білдірген.
"Біз оны есі дұрыс емес деп танып, нақты жазадан құтылып кете ме деп қорқамыз", — деген еді Нұрайдың ағасы.
Бүгін не белгілі
Күдіктіге Қылмыстық кодекстің бірден үш бабы бойынша айып тағылған:
- 99-баптың 2-бөлігінің 5-тармағы — "Аса қатыгездікпен жасалған адам өлтіру";
- 125-1-бап — "Неке қиюға мәжбүрлеу";
- 115-1-бап — "Сталкинг".
Істің хронологиясы
Қайғылы оқиға 11 қаңтарда болған. Интернетте тараған бейнебақылау камераларының жазбаларында ер адамның қызды қуып жүргені, қыздың қашуға және қарсылық көрсетуге тырысқаны көрінеді. Бұдан кейін күдікті оны пышақтап, оқиға орнынан қашып кеткен. 13 қаңтарда полиция өңірдің 28 жастағы тұрғынын ұстаған.
Кейін шабуылдың кенеттен болмағаны айтылды. Туыстарының сөзінше, оған дейін бірнеше ай бойы қудалау және алып қашу (қалыңдық ұрлау) оқиғасы болған. Отбасы полициядан бірнеше рет әрекет күтсе де, олардың арызы қабылданбағанын мәлімдеген.
Жағдайға Президент Қасым-Жомарт Тоқаев реакция білдірді. 20 қаңтарда Ұлттық құрылтайдың V отырысында ол полицияның әрекеттерін бағалауды тапсырды. Сол күні Шымкент полициясының басшысы Нұрлан Алмасбековтің жұмыстан босатылғаны, ал некеге мәжбүрлеу туралы істі тіркемеген қызметкерлерге қатысты салғырттық фактісі бойынша қылмыстық іс қозғалғаны белгілі болды.
Осыдан кейін әлеуметтік желілерде, болжам бойынша, Шымкент полиция департаментінің бұрынғы қызметкерлері жариялаған видео тарады. Жазбада Нұрай Серікбай өзін некеге мәжбүрлеу мақсатында ұрламағанын және сол күні күдіктінің көлігіне өз еркімен отырғанын айтады. Роликте Нұрайдың ер адамға шағымы жоқ екені де айтылады.
Кейбір БАҚ-қа берген сұхбаттарында экс-полицейлер өздерінің жұмыстан босатылуын әділетсіз деп атаған.
Отбасының адвокаты Сержан Нұрпейісов жәбірленуші тарап тергеу құпиясын бұзу бойынша ресми шағым түсіргенін хабарлады.
