Иранның Қызыл Жарты айы мұнай қоймаларындағы жарылыстар қышқыл жаңбырға әкелуі мүмкін екенін ескертті
**Иранның Қызыл Жарты айы** мұнай қоймаларындағы жарылыстар қышқыл жаңбырға әкелуі мүмкін екенін айтып, халыққа ескерту жасады.
Құтқарушылардың мәлімдеуінше, мұнай қоймаларының жарылысы атмосфераға көмірсутектердің улы қосылыстарының, күкірт пен азот оксидтерінің көп мөлшерде таралуына себеп болады. Олардың айтуынша, егер осы кезде жаңбыр жауса, ол өте қауіпті болып, айқын қышқыл қасиетке ие болады.
Қызыл Жарты ай өкілдері мұндай құбылыс терінің химиялық күйігіне және өкпеге елеулі зиян келтіруі мүмкін екенін атап өтті.
Бұған дейін Израиль қорғаныс армиясы (ЦАХАЛ) Иранның мұнай инфрақұрылымына алғашқы әуе соққылары жасалғанын хабарлаған. ЦАХАЛ өкілінің сөзінше, Тегеранда кемінде 30 мұнай резервуары нысанаға алынған.
Кейін Иран парламентінің энергетика жөніндегі комиссиясының өкілі Исмаил Хосейни соққы тек төрт жанармай сақтау нысанына тигенін нақтылады. Сонымен қатар Тегерандағы мәлімдемеге сәйкес, халықты отынмен қамтамасыз етуге қауіп жоқ.
Сонымен бірге мұнай қоймаларына жасалған соққылар салдарынан кемінде төрт адам қаза тапқаны хабарланды.
