Шымкент тұрғыны әкімдіктен мемлекет қажетіне алынған жері үшін өтемақы өндіріп алды
**Шымкентте** қала тұрғыны мемлекет қажетіне алынған жер учаскесі үшін өтемақы өндіруді талап етіп, әкімдікке қарсы сотқа жүгінді.
Не болды Іс қалалық ауданаралық азаматтық істер жөніндегі сотта қаралды. Талапкерге **0,19 гектар** жер учаскесі тиесілі болған.
Әкімдіктің қаулысында талапкердің жер учаскесін **мемлекет қажетіне мәжбүрлеп иеліктен шығару** және оған өтемақы төлеу көзделген. Алайда талапкер алынатын жер үшін ұсынылған **46 миллион теңге** өтемақымен келіспеген.
Осыдан кейін Шымкент әкімдігі жер учаскесін мемлекет қажетіне мәжбүрлеп алу туралы сотқа талап арыз берген. Дегенмен талапкердің өтініші бойынша сот бұл талап арызды **қараусыз қалдырған**.
Сотта айтылғандай, кейін әкімдік аталған жер учаскесін мемлекет қажетіне мәжбүрлеп алу бойынша шара қабылдамаған. Соған қарамастан, әкімдік қаулысының негізінде жер учаскесі талапкерден алынып, қазіргі уақытта ол жерде **жалпыға ортақ автокөлік жолы** салынған. Бірақ талапкерге өтемақы төленбеген.
Сот не шешті Соттың құрылыс-техникалық сараптамасының қорытындысына сәйкес, талапкердің жер учаскесінің **нарықтық құны 83 миллион теңгеден асады**.
Сот шешімімен ер адамның талабы қанағаттандырылды. **«Шымкент қаласының жер қатынастары басқармасы»** мемлекеттік мекемесі талапкерге мемлекет қажетіне алынған жер учаскесі үшін **83 419 500 теңге** мөлшерінде өтемақы төлеуге міндеттелді.
Сонымен қатар сот заң бұзушылықтар туралы **Шымкент әкіміне** жеткізу жөнінде **жеке ұйғарым** шығарды. Сот мәліметінше, мемлекет қажетіне жерді мәжбүрлеп алу рәсімін құзыретті мемлекеттік орган жүргізуі тиіс. Алайда талапкерден **5 жыл бұрын**, яғни **2020 жылы** алынған жер учаскесі бойынша мәжбүрлеп алу рәсімі бүгінге дейін жүргізілмеген.
Осылайша, сот талапкердің жер учаскесіне меншік құқығы бұзылғанын анықтап, талапты қанағаттандыру арқылы оны қалпына келтірді. Шешім мен жеке ұйғарым **заңды күшіне енді**.
