Трамп Моджтаба Хаменейдің Иранның жоғарғы көшбасшысы болып сайлануына наразылығын білдірді, Путин құттықтады
**АҚШ президенті Дональд Трамп** Моджтаба Хаменейдің Иранның жоғарғы көшбасшысы болып сайлануына қатысты пікір білдіріп, бұл шешімге көңілі толмайтынын айтты және оқиғалардың әрі қарай қалай өрбитінін бақылап отыратынын жеткізді.
Трамп Fox News телеарнасындағы эфирде: **«Мен наразыбын (Моджтаба Хаменейдің Иранның жоғарғы көшбасшысы ретінде сайлануына — ред.)»**, — деді.
Сондай-ақ ол Times of Israel басылымына берген сұхбатында Ирандағы жаңа жоғарғы көшбасшының сайлануына байланысты жағдайдың дамуын бақылап отыратынын атап өтті.
**«Көрейік, не болады»**, — деді Трамп, егжей-тегжейіне тоқталмай.
Өз кезегінде **Ресей президенті Владимир Путин** Моджтаба Хаменейді Иранның жоғарғы көшбасшысы қызметіне тағайындалуымен құттықтаған әлемдік көшбасшылардың алғашқыларының бірі болды.
Кремль сайтында жарияланған жеделхатта: **«Иран Ислам Республикасының жоғарғы жетекшісі аятолла Сейед Моджтаба Хоссейни Хаменей мырзаға. Сайлануыңызға орай шынайы құттықтауымды қабыл алыңыз»**, — делінген.
Путин Мәскеу Тегеранның сенімді серіктесі болғанын және бола беретінін атап өтті. Ресей президенті сондай-ақ Иранның жаңа көшбасшысы әкесінің ісін жалғастырып, халықты біріктіреді деген сенім білдіріп, оған табыс пен рух күшін тіледі.
**«Қазір, Иран қарулы агрессияға қарсы тұрған кезде, осы жоғары қызметтегі қызметіңіз, сөзсіз, үлкен батылдық пен жанқиярлықты талап етеді»**, — деді Кремль басшысы.
Бұған дейін Иранның сарапшылар кеңесі АҚШ пен Израиль соққылары салдарынан қаза тапқан аятолла **Али Хаменейдің** ұлы **Моджтаба Хаменей** Ислам Республикасының жаңа жоғарғы көшбасшысы болып сайланғанын растаған.
Бұрынғы Иранның жоғарғы көшбасшысы **Али Хаменей** АҚШ пен Израильдің әскери операциясының алғашқы күні — **28 ақпанда** қаза тапқаны айтылды. Елде **40 күндік аза тұту** жарияланған.
