Трамп Зеленскийді сынға алып, онымен келісу Путинге қарағанда қиын екенін айтты
АҚШ көшбасшысы Дональд Трамп Украина президенті Владимир Зеленскийді сынға алып, онымен келісімге келу Ресей президенті Владимир Путинге қарағанда қиынырақ екенін айтты. Бұл туралы Ақ үй басшысы NBC News-ке телефон арқылы берген сұхбатында мәлімдеді.
Трамптың айтуынша, ол Зеленскийдің келісім жасауға құлықсыз екеніне таңғалған.
"Мен Зеленскийдің келісім жасағысы келмейтініне таңғалдым. Зеленскийге айтыңдар, келісім жасасын, өйткені Путин келісімге дайын, — деді ол. — Зеленскиймен келісім жасау әлдеқайда қиын".
Сұхбатта бұған дейін Украина президенті Таяу Шығыста америкалық күштер мен олардың одақтастарына ирандық ұшқышсыз аппараттарды қағып түсіруге көмектесуді ұсынғаны еске салынды. Бұл ұсыныс украин әскери күштерінің ресейлік дрондарға қарсы күрестегі тәжірибесіне негізделгені айтылды.
Трамп өз кезегінде Вашингтонға "көмек қажет емес" екенін мәлімдеді.
"Бізге көмек керек болатын соңғы адам — Зеленский", — деп қосты ол.
Президент Вашингтон Киевтің дрондарды қағып түсіру технологиялары бойынша көмек ұсынуын қабылдады ма деген сұраққа пікір білдіруден бас тартты.
Сондай-ақ Ақ үй басшысынан БАҚ-тағы Мәскеу Тегеранға Таяу Шығыстағы америкалық күштердің орналасқан жері туралы барлау деректерін беріп жатыр деген хабарламаларға қатысты пікір сұралды.
"Ресей, мүмкін, ақпарат беріп жатқан шығар, мүмкін, жоқ", — деп жауап берді Трамп.
Сонымен бірге президент АҚШ-тың да "осылай істейтінін" айтып, Украинаға аздаған мәлімет жіберетінін және екі ел арасында бейбітшілікке қол жеткізуге тырысып жатқанын жеткізді.
EXCLUSIVE: Trump tells NBC News that Iran is ready to negotiate a ceasefire but he's not ready to make a deal. https://t.co/EGRCDNI5hy — NBC News (@NBCNews) March 14, 2026
Осыған дейін Зеленский келіссөз процесін 10 жыл көрсетілген әйгілі "Санта-Барбара" телехикаясымен салыстырған. Оның айтуынша, келіссөздер Таяу Шығыста тұтанған соғысқа байланысты тұралап қалған.
