Трамп әкімшілігі Таяу Шығыстағы операцияны күшейту үшін мыңдаған америкалық әскери қызметкерді орналастыру мүмкіндігін қарастыруда
АҚШ президенті Дональд Трамптың әкімшілігі Таяу Шығыстағы операцияны күшейту үшін мыңдаған америкалық әскери қызметкерді орналастыру мүмкіндігін қарастырып жатыр. Әскерді қайта орналастыру Иранға қарсы әскери науқан аясындағы ықтимал келесі қадамдарға дайындықпен байланысты екені айтылды.
Жаңа кезеңдер Ормуз бұғазы арқылы мұнай танкерлерінің қауіпсіз өтуін қамтамасыз етуді қамтуы мүмкін. Дереккөздердің айтуынша, бұл міндет негізінен әскери-әуе және әскери-теңіз күштері арқылы орындалмақ. Сонымен қатар, мұндай міндет америкалық әскерді Иран жағалауына орналастыруды да білдіруі ықтимал.
Трамп әкімшілігі Иранның мұнай экспортындағы орталық саналатын Харг аралына құрлық әскерін жіберу нұсқаларын да талқылаған.
Материалда америкалық құрлық әскерін кез келген түрде пайдалану — тіпті шектеулі миссия үшін болса да — Трамп үшін елеулі саяси тәуекелдер туғызуы мүмкін екені атап өтіледі. Бұған Иранға қарсы үшінші аптаға созылған науқанға АҚШ қоғамының қолдауының төмен болуы және Трамптың сайлауалды уәделерінде АҚШ-ты Таяу Шығыстағы жаңа қақтығыстарға араластырмауға тырысатынын мәлімдеуі себеп ретінде келтірілген.
Дереккөздер сондай-ақ Трамп әкімшілігінің өкілдері Иранның жоғары байытылған уран қорларының қауіпсіздігін қамтамасыз ету үшін америкалық әскерді орналастыру мүмкіндігін талқылағанын хабарлады.
Сарапшылардың пікірінше, бұл міндет тіпті АҚШ арнайы мақсаттағы күштері үшін де аса күрделі әрі қауіпті болуы мүмкін.
Көп жылдар бойы Трамп өзінен бұрынғы президенттерді қақтығыстарға араласқаны үшін қатаң сынап, АҚШ-тың шетелдегі соғыстарға қатысуына жол бермейтінін айтып келген. Алайда соңғы уақытта ол Ирандағы «жерүсті қатысу» мүмкіндігін жоққа шығарудан бас тартып отыр.
Трамп Ормуз бұғазының қауіпсіздігін АҚШ қамтамасыз етуі керек пе деген мәселеде де бірнеше рет ұстанымын өзгерткен. Алдымен ол АҚШ ӘТК кемелері кемелерді алып жүруі мүмкін екенін айтқан, кейін бұл маңызды су жолын ашуға басқа елдерді көмектесуге шақырған. Одақтастар америкалық-израильдік науқанға қатысудан бас тартқаннан кейін, Трамп бұл мәселені шешусіз қалдырып, жай ғана кету туралы да ойланған.
Еске салайық, шиеленістің жаңа кезеңі Израиль Қарулы күштері Иранның мұнай-газ секторына соққы жасағаннан кейін басталды. Бұған жауап ретінде Тегеран Катардағы ең ірі газ өңдеу зауытына шабуыл жасап, көршілес араб елдеріндегі тағы бірнеше нысананы атады.
