Ербол Хамитов Италиядағы Паралимпиадада парабиатлоннан қуу жарысында алтын медаль жеңіп алды
**Қазақстандық парабиатлоншы Ербол Хамитов** Италияда өтіп жатқан Паралимпиада ойындарында қуу жарысында жеңіске жетіп, **алтын медаль** алды.
Қуу жарысына іріктеу саналатын спринттен кейін қазақстандық спортшы бірінші орында болып, ең жақын қарсыласынан **10 секундқа** озып тұрған. Алайда спортшылар санаттарының айырмашылығына байланысты ол қуу жарысын көшбасшы ретінде бастамаған.
Бірінші ату кезеңіне қарай Хамитов алдыңғы орынға шығып, нысананы дәл атып, жарысты бірінші болып жалғастырды.
Екінші ату кезінде қазақстандық спортшы **бір рет мүлт кетті**, бірақ қарсыластары да дәлдік таныта алмады. Нәтижесінде Хамитов мәреге **20 секундтық** басымдықпен шықты.
Осылайша, қуу жарысының қорытындысы бойынша **алтын медаль** Қазақстан спортшысына бұйырды.
Бұл жүлде Хамитов үшін қазіргі Ойындардағы парабиатлоннан **екінші медаль** болды. **10 наурызда** ол шаңғы спринтінде **қола медаль** жеңіп алған, бұл Қазақстан үшін Италиядағы алғашқы жүлде болған.
Ербол Хамитов спортпен бала кезінен айналысқан және **19 жасында** аяғынан айырылғаннан кейін де спортты тоқтатпаған: жас жігіттің тізесіне оқ тиіп, ампутация жасауға тура келген.
**2017 жылы** ол грэпплингтен Қазақстан кубогының жүлдегері атанды, алайда ең үлкен жетістіктеріне қысқы спорт түрлерінде қол жеткізді. **2023 жылы** пара шаңғы жарысынан әлем чемпионы атанса, **2025 жылы** пара биатлоннан әлем чемпионатында алтын жеңіп алған **алғашқы қазақстандық** болды.
Паралимпиада ойындары Италияда **15 наурызда** аяқталады. Хамитов **20 шақырымдық** шаңғы жарысына қатысады.
