Тоқаев Астанадағы форумда қазақстандықтарды жаңа Конституция жобасы бойынша референдумда дауыс беруге шақырды
Президент Қасым-Жомарт Тоқаев Астанада барлық деңгейдегі мәслихат депутаттарының форумында сөйлеген сөзінде қазақстандықтарға, әсіресе жас азаматтарға, жаңа Конституция жобасына қатысты үндеу жасады.
Мемлекет басшысы жаңа Конституция жобасы ең алдымен жастарға арналғанын атап өтіп, референдумда дауыс беру арқылы ел тағдырына қатысуға мүмкіндік бар екенін айтты. Оның сөзінше, бұл таңдау «бюллетеньдегі жай ғана белгі емес, Халық Конституциясы үшін айтылған салмақты сөз».
Президенттің айтуынша, Қазақстанды орнықты прогресс жолына шығару міндеті жас қазақстандықтардың еншісінде. Ол жастар жақын уақытта бірлік, ынтымақ, еңбекқорлық және заңға бағыну қағидаттарына негізделген қоғам құру миссиясын өз мойнына алатынын, сондай-ақ білім, ғылым, мәдениет және зайырлылық құндылықтары орнығатын қоғам қалыптасатынын айтты. Сонымен бірге, тоталды цифрландыру мен жасанды интеллект күнделікті өмірдің ажырамас бөлігіне айналатынын атап өтті.
Сондай-ақ Мемлекет басшысы жаңа Конституция жобасы адам құқықтары мен бостандықтарын қорғауды абсолют деңгейге көтеретінін еске салды.
