Шымкентте интернет-алаяқтыққа қатысы бар шетелдік азамат ұсталды ⚡️
Шымкентте полиция интернет-алаяқтыққа қатысы бар шетелдікті ұстады
Шымкент қаласында киберполицейлер тұрғындар зардап шеккен алаяқтық схеманың жолын кесті.
Жедел-іздестіру іс-шаралары барысында киберқылмысқа қарсы іс-қимыл басқармасының қызметкерлері күдіктіні анықтап, ұстады. Ол Алматы қаласында тұратын, интернет арқылы жасалатын алаяқтық әрекеттерді ұйымдастыруға және үйлестіруге қатысы бар шетелдік азамат ретінде көрсетілді.
Алаяқтық схемасы психологиялық қысым көрсетуге негізделген. Күдіктілер жәбірленушілерге қоңырау шалып, өздерін банк немесе мемлекеттік органдардың қызметкерлері ретінде таныстырып, түрлі сылтаулармен ақшаны “қауіпсіз шоттарға” аударуға көндірген. Соның салдарынан азаматтар өз жинақтарынан айырылған.
Қазіргі таңда алаяқтықтың үш фактісі анықталды. Келтірілген жалпы шығын шамамен 8 миллион теңгені құрайды.
Тексеру барысында ұрланған қаражат аударылған шоттар да анықталды. Олар Алматыда тұратын төрт шетелдік студенттің атына рәсімделгені белгілі болды. Олардың банк карталары мен шоттары заңсыз схема аясында пайдаланылып, қаражатты қолма-қол ақшаға айналдыру және әрі қарай аудару үшін қызмет атқарған.
Күдікті ұсталып, уақытша ұстау изоляторына қамалды. Тергеу әрекеттері жүргізіліп жатыр.
Полиция азаматтарды мұқият болуға шақырады: бейтаныс адамдардың қоңырауларына сенбеңіздер, олардың нұсқауымен қаржылық операциялар жасамаңыздар. Банк қызметкерлері мен мемлекеттік органдар ешқашан телефон арқылы ақша аударуды талап етпейді.
