Қара теңізде қазақстандық мұнайға бағыт алған грек танкері Maran Homer-ге шабуыл жасалды
Бүгін Қара теңізде қазақстандық мұнай алуға бағыт алған грек Maran Homer танкеріне шабуыл жасалды.
Мәліметке сәйкес, кеме Ресейдің аумақтық суларынан тыс жерде тұрған кезде, Новороссийскідегі Каспий құбыр консорциумы (КҚК) терминалына кіруге рұқсат күтіп тұрған сәтінде белгісіз нысанның соққысына ұшыраған. Танкер қазақстандық мұнай қабылдауы тиіс болған.
Анықтама: Каспий құбыр консорциумы (КҚК) — қазақстандық мұнай экспортының негізгі бағыттарының бірі. Осы құбыр арқылы Қазақстаннан мұнай Ресейге жеткізіліп, кейін Қара теңіздегі Новороссийск маңындағы КҚК теңіз терминалы арқылы экспортқа жөнелтіледі. Бұл терминал арқылы қазақстандық мұнай экспортының шамамен 80 пайызы өтеді.
Жарияланған ақпаратта: зардап шеккендер жоқ, экипаж қауіпсіз екені айтылған. Кеме палубасы мен палубалық жабдықтары аздап зақымданған, танкер бос болған, қоршаған ортаға ластану жоқ. Сондай-ақ кеме Новороссийскіден шығып кеткені көрсетілген.
Оқиғаға Грекияның теңіз істері және аралдық саясат министрі Василис Кикилиас пікір білдірді. Ол алаңдаушылық танытып, шабуылды Ресей мұнайын санкциялардан уақытша шығару туралы жуырда қабылданған шешімдермен байланысты болуы мүмкін деп болжаған.
Министрдің айтуынша, кеме Chevron компаниясы тарапынан фрахтқа алынған, Салоникиден шыққан және ешқандай жүк тасымалдамаған. Кикилиас бұл оқиғаға байланысты Афины Еуроодақ кеңесі деңгейінде кеме қатынасының қауіпсіздігі мәселесін көтеруді жоспарлап отырғанын мәлімдеді.
«Жаһандық кеме қатынасы болмаса, сауда да болмайды», — деп атап өтті ол.
Контекст Жыл басында Қазақстан мұнайына арналған танкерлерге бұған дейін де шабуыл жасалған. Атап айтқанда, 13 қаңтарда ұшқышсыз аппараттар «ҚазМұнайГаздың» еншілес құрылымы жалдаған Matilda танкеріне шабуыл жасаған. Шабуыл салдарынан өртсіз жарылыс болған. Энергетика министрі Ерлан Аккенженовтің айтуынша, мұндай шабуылдар түсініксіз, өйткені Қазақстан кемелері ешқандай «сұр флотилияға» жатпайды.
Осыған байланысты Қазақстанның Сыртқы істер министрлігі елеулі алаңдаушылық білдірді. Ведомство Қазақстан қандай да бір қарулы қақтығыстың тарапы емес екенін, жаһандық және еуропалық энергетикалық қауіпсіздікті нығайтуға елеулі үлес қосатынын және энергия тасымалдаушыларды жеткізудің үздіксіздігін халықаралық нормаларға толық сәйкес қамтамасыз ететінін атап өтті.
Жалпы, КҚК инфрақұрылымына жасалған шабуылдар салдарынан Қазақстан уақытша шамамен 3,8 миллион тонна мұнайды экспорттай алмаған. Ерлан Аккенженовтің нақтылауынша, бұл — белгіленген кезеңде шығарылмай, сатылмай қалған мұнай көлемі, ал тікелей қаржылық шығын емес.
