Шетелдегі учаскелерде 9050 қазақстандық дауыс берді — алдын ала дерек
Қазақстан Республикасы Сыртқы істер министрінің орынбасары Арман Исетов шетелдегі учаскелерде дауыс берген қазақстандықтар бойынша алдын ала мәліметтерді жариялады.
Сағат 19:00-дегі жағдай бойынша шетелде референдумның 14 учаскелік комиссиясы жұмысын аяқтаған. Бұл учаскелер Индонезия, Оңтүстік Корея, Қытай, Сингапур, Малайзия, Моңғолия, Жапония, Вьетнам және Таиландта орналасқан.
Жалпы шетелде 9050 Қазақстан азаматы дауыс берген.
Исетовтің айтуынша, 00:00-ге дейін өз жұмысын 64 учаске аяқтайды. Ал шетелдегі дауыс беру процесі Қазақстан Республикасының Сан-Францискодағы Бас консулдығы жанындағы референдум учаскесінде 16 наурыз күні Астана уақытымен 08:00-де толық аяқталады.
Толығырақ
Қазіргі уақытта шетелде 57 учаске жұмысын жалғастырып жатыр. Атап айтқанда, олар Орталық Азия, Еуропа, Оңтүстік және Солтүстік Америка елдерінде орналасқан.
Еске салайық, бүгін Астана уақытымен 03:00-де ең алғашқы болып Токио мен Сеулдегі дауыс беру учаскелері ашылған.
Ең соңғы болып Сан-Францискодағы учаске ашылады: ол бүгін Астана уақытымен 19:00-де жұмысын бастап, 16 наурыз күні 08:00-де жабылады.
Жалпы Қазақстанның шетелде 54 елде 71 сайлау учаскесі бар. Бұл учаскелерде шетелде жүрген 14 230 Қазақстан азаматы дауыс бере алады.
Бастапқыда шетелде 82 учаске ашу жоспарланған. Алайда 10 елде «күрделі әскери-саяси жағдай және азаматтарымыздың өкілдік деңгейінің төмендігі» себепті 11 учаске ашылмаған. Бұл елдер: Иран, Израиль, Иордания, Катар, Біріккен Араб Әмірліктері (2 учаске), Оман, Ливан, Кувейт, Украина және Эфиопия.
Контекст
Бүгін Қазақстанда жаңа Конституция бойынша референдум өтіп жатыр. Дауыс беру учаскелері 15 наурыз күні 7:00-де ашылып, 20:00-ге дейін жұмыс істейді.
Дауыс беруге референдум күніне 18 жасқа толған Қазақстан азаматтарының барлығы қатыса алады. Бюллетеньдер қазақ және орыс тілдерінде басылған.
Бюллетеньде бір ғана сұрақ бар:
"Қазақстан Республикасының бұқаралық ақпарат құралдарында 2026 жылғы 12 ақпанда жарияланған жаңа Конституциясының жобасын қабылдайсыз ба?"
Жауаптың екі нұсқасы ұсынылған: "Иә, келісемін (-на)" немесе "Жоқ, келіспеймін (-на)". Тараулар немесе баптар бойынша бөлек дауыс беру қарастырылмаған — құжатқа толықтай ғана дауыс беруге болады: не толық қолдау, не толық қабылдамау.
Референдум нәтижелері 2026 жылғы 21 наурызға дейін жарияланады.
