Air Astana Алматы мен Астанадан Дубайға рейстерді уақытша тоқтатты
**Air Astana** Алматы мен Астанадан Дубайға қатынайтын рейстерді уақытша тоқтататынын мәлімдеді. Шектеу **11–31 наурыз** аралығында (қоса алғанда) қолданылады.
Неліктен рейстер тоқтатылды Әуекомпания шешімді Таяу Шығыстағы қазіргі жағдаймен түсіндірді.
"Таяу Шығыстағы шиеленіскен жағдайға байланысты Air Astana әуекомпаниясы Алматыдан Дубайға және Астанадан Дубайға тұрақты рейстерді 11–31 наурыз аралығында (қоса алғанда) тоқтатады", — деп хабарлады тасымалдаушы.
Рейстері тоқтатылған жолаушыларға не ұсынылады Әуекомпания жолаушыларға екі нұсқа ұсынды: ақшаны қайтару немесе сапарды кейінгі мерзімге қосымша төлемсіз ауыстыру.
"Рейстері тоқтатылған жолаушыларға айыппұлсыз толық қайтарым немесе 1 сәуірден 31 мамырға дейінгі кезеңде орындалатын рейстерге тегін қайта брондау ұсынылады", — делінген хабарламада.
Жолаушылар билет құнын толық қайтарып ала алады немесе **сәуірден бастап** басқа күнді таңдай алады.
Билеттер бойынша мәліметті нақтылау немесе қайтарымды рәсімдеу үшін әуекомпанияның брондау және ақпарат орталығына жүгінуге болады. Орталық **тәулік бойы** жұмыс істейді.
Бұған дейінгі шектеулер Бұған дейін, **28 ақпанда**, Air Astana Таяу Шығыс бағыттарының барлығына рейстерді **3 наурызға дейін** тоқтататынын хабарлаған. Шешім Қазақстанның Авиациялық әкімшілігінің Таяу Шығыс елдеріне ұшуға **толық тыйым салу** туралы нұсқамасына сәйкес қабылданған.
Кейін Air Astana Таяу Шығысқа рейстерді тоқтату мерзімін **6 наурызға дейін** ұзартты.
Азаматтық авиация комитеті тыйымның **Иран, Израиль, Сирия, Ирак, Иордания және Ливан** әуе кеңістігінің үстімен, шегінде және оған жақын аумақта ұшуға қатысты екенін және **ерекше өкімге дейін** күшінде болатынын түсіндірген. Тыйым Қазақстан әуекомпанияларының барлық рейстеріне — тұрақты және тұрақты емес, жолаушылар, жүк және техникалық рейстерге қолданылады.
Сондай-ақ бұған дейін әртүрлі елдерден туристердің үйге оралу құны туралы айтылған еді.
