КНБ: Астана, Ақмола және Павлодар облыстарында автошколалар мен жүргізуші куәлігін рәсімдеу кезінде заңсыз сыйақы алу фактілері анықталды
КНБ-ның Сыбайлас жемқорлыққа қарсы іс-қимыл қызметі жыл басынан бері Астана қаласында, Ақмола және Павлодар облыстарында автошколалар қызметі мен жүргізуші куәліктерін рәсімдеу барысында заңсыз сыйақы алу және қызметтік өкілеттікті теріс пайдалану фактілерін анықтады.
Мысал ретінде, Астанада арнайы ХҚКО басшысының бұрынғы орынбасары әшкереленді. Ол азаматтарға емтихан тапсыруға және жүргізуші куәлігін алуға жүйелі түрде пара үшін жәрдемдескен.
КНБ мәліметінше, бұл іс бойынша 60-тан астам факт процессуалдық тәртіппен құжатталған, ал жалпы сома 100 миллион теңгеден асады.
Сондай-ақ Көкшетау арнайы ХҚКО филиалы мен Екібастұздағы «Азаматтарға арналған үкімет» мемлекеттік корпорациясы басшыларының заңсыз қызметі тоқтатылды. Олардың емтихан тапсыруды жалған тұлғалар арқылы ұйымдастырғаны үшін ақша алғаны анықталған.
Бұдан бөлек, «Азаматтарға арналған үкімет» мемлекеттік корпорациясының Астана, Шымкент және Тараз қалаларындағы филиалдарында лауазымды тұлғалардың жылжымайтын мүлікті қайта тіркеу және ауыртпалықтарды алып тастау кезінде өкілеттіктерін теріс пайдалану арқылы заңсыз баю фактілері анықталған.
Аталған фактілер бойынша сотқа дейінгі тергеп-тексерулер жүргізіліп жатыр.
Бұған дейін қазақстандықтардың жүргізуші куәлігін алу кезіндегі қиындықтарға қатысты шағымдары туралы айтылған. Олардың сөзінше, емтиханға кезек айларға созылады, ал құқық алу үдерісі жарты жылға дейін созылуы мүмкін.
Сондай-ақ: қазақстандықтарды қайта тапсыруға жіберуі мүмкін бұзушылықтар аталды.
