Атырау облысында Жангелдин ауылынан жоғалған отбасы ісі: барлық мәйіт табылды, күдіктілер Қазақстанға экстрадицияланды
Атырау облысында Жангелдин ауылынан жоғалған отбасыға қатысты резонансты іс бойынша тергеу жалғасып жатыр. Қазіргі сәтке дейін жоғалғандардың барлығының мәйіті табылған.
Кісі өлтіруге күдікті ретінде Сұлтан Сәрсемалиев пен оның жұбайы Ақбаян Мұқанғалиева аталады. Олар бұған дейін Интерпол желісі арқылы Индонезияда, Ломбок аралында ұсталған. Жеке басы тексерілгеннен кейін күшейтілген күзетпен Қытай арқылы транзит жасап, Қазақстанға экстрадицияланған.
Кадрлардан Ақбаянның аяқтарында кінәрат бар екені байқалады, сондықтан ол кейде мүгедектер арбасын пайдаланып қозғалады.
8 наурыз күні кешке Алматы халықаралық әуежайында ұсталғандар ресми түрде Қазақстан полициясына және Интерполдың Ұлттық орталық бюросына тапсырылған.
Елге жеткізілгеннен кейін Сәрсемалиев Атырауға этапталып, уақытша ұстау изоляторына қамалған. Оның жұбайы психоневрологиялық диспансерге жіберілген.
Тергеу Сәрсемалиевтің жұбайының төрт туысын өлтіруге қатысы болуы мүмкін деп санайды. Тергеу жалғасып жатыр.
Сондай-ақ, бір күн бұрын тергеушілер бұрын өлтірілген ерлі-зайыптылар — Мақсот Қарабалин мен Насип Утешкалиеваның балалары Наурыз бен Мирамгүлдің мәйіттерін тапқаны атап өтілді.
