Қарағандыда күйеуінің соққысынан кейін қыздың көкбауыры алынды
Қарағандыда Риза есімді қыз күйеуінің ұрып-соғуынан кейін ауыр хәлде ауруханаға жеткізіліп, оған көкбауырын алып тастау операциясы жасалғанын айтты.
Жәбірленушінің айтуынша, оқиға ол 16 жаста болған кезде басталған: сол уақытта 31 жастағы ер адам оған көңіл бөле бастаған. Уақыт өте келе, оның сөзінше, қамқорлық қорқытуға және тұрақты соққыға ұласқан.
«Мен одан қорқатынмын, өйткені ол бұрын адамдарды бірнеше рет көліктің жүксалғышына салып, қала сыртына алып шығып ұрғанын айтатын. Ол мені алғаш рет ұрғанда мен небәрі 16 жаста едім және жақындыққа мәжбүрледі. Ата-анам полицияға арыз жазғысы келді, бірақ ол кешірім сұрады, ал мен жағдай одан әрі нашарлап кетеді деп қорықтым», — деп еске алады жәбірленуші.
Қыздың айтуынша, ер адам оған және оның отбасына қоқан-лоқы көрсетіп, ол үнемі қорқынышта өмір сүрген. Соған қарамастан, 17 жасында одан бала туғанын, кейін екеуі некені ресми түрде тіркегенін айтады.
Биыл ер адам ажырасуға арыз берген. Қыздың сөзінше, ол қорқыту мен байланыстарын пайдаланып, олардың ұлы өзімен қалуына келісуге мәжбүрлеген. Сондай-ақ жәбірленуші оның ықпалды таныстары бар екенін алға тартады.
Қыздың айтуынша, сәуір айында ер адам оны бірнеше күн қатарынан ұрып-соққан. Жағдайы күрт нашарлаған кезде ол туыстарына қоңырау шалған. Туыстары жедел жәрдем мен полиция шақырып, қыз ауыр хәлде ауруханаға жеткізілген. Сол жерде оған көкбауырын алып тастау операциясы жасалған.
Қазір жәбірленуші бұрынғы жұбайы жауапкершіліктен құтылып кетуі мүмкін деп қауіптенеді.
t.me/kriminal_kazakhstan
