Астанада Threads желісіндегі даулы жазбаның авторы ұсталды
Астанада Threads әлеуметтік желісінде жарияланған резонанс тудырған аноним жазбаның авторы ұсталды. Жазбада автор әскерде қызмет еткен кезде өзіне қатысты жыныстық зорлық жасалғанын айтып, қудалаудан қорқатынын мәлімдеген.
Не болды 23 ақпанда Threads платформасында аноним пост жарияланып, онда автор әскери қызмет кезінде жыныстық зорлыққа ұшырағанын, қудалаудан қауіптенетінін жазған. Ол әскерден бір жыл бұрын оралғанын, бірақ әлі күнге дейін болған оқиғадан айыға алмай жүргенін көрсеткен.
Жарияланымда командирдің оны жыныстық сипаттағы әрекеттерге мәжбүрлегені және күш қолданамын деп қорқытқаны айтылған. Автор оқиғаны егжей-тегжейлі сипаттап, бұл көптеген қолданушының назарын аударған.
Сонымен қатар ол елден шұғыл кету қажеттігін алға тартып, қаржылай көмек сұраған. Постқа ақша аударуға арналған банк реквизиттері қоса берілген.
Алдау қалай әшкереленді Оқиғаның шынайылығына күмәнданған қолданушылардың бірі көрсетілген деректерді тексеру үшін полицияға жүгінген. Тексеру барысында полиция қызметкерлері банк шотының иесін анықтаған — ол 17 жастағы жасөспірім болып шыққан.
Жасөспірім реквизиттерін хостелде танысқан танысына бергенін айтқан. Оның сөзінше, әлгі адам өз шоттарында мәселелер барын айтып, аударымдарға көмектесуді сұраған. Жасөспірім ықтимал заңсыз әрекеттер туралы білмеген.
Екі күн ішінде оның шотына қолданушылардан 100-ден астам аударым түскен.
Ұстау және салдары Жедел-іздестіру шаралары барысында жарияланым авторы анықталып, ұсталған.
Полицияның мәліметінше, жарияланған ақпарат шындыққа сәйкес келмейді. Сондай-ақ контент авторының әскери қызметке қатысы жоқ екені және ешқашан әскерде қызмет етпегені анықталған. Полицияның айтуынша, 23 жастағы қала тұрғыны жалған хабарламаны ақша жинау мақсатында әдейі орналастырған.
Көрінеу жалған ақпарат тарату және алаяқтық фактілері бойынша қылмыстық істер қозғалды. Күдікті сот санкциясымен қамауға алынып, уақытша ұстау изоляторына қамалды.
