Қазақстандықтарға хантавирус инфекциясына қатысты ескерту жасалды
Денсаулық сақтау министрлігінің Санитарлық-эпидемиологиялық бақылау комитеті шетелге шығатын қазақстандықтарға хантавирус инфекциясының әкеліну қаупіне байланысты ескерту жасады.
Ведомство хантавирус инфекциясының адамға негізінен кеміргіштермен немесе олардың бөлінділерімен жанасу арқылы жұғатын қауіпті вирустық ауру екенін еске салды. Ол бүйрек синдромымен геморрагиялық қызбаны және хантавирустық өкпе синдромын тудыруы мүмкін.
Вирус ағзаға мына жолдармен түсуі мүмкін: - шаң; - тамақ; - су; - кеміргіштердің шағуы.
Осыған байланысты Комитет шетелге шығатын азаматтарға арналған алдын алу шараларын жариялады: - кеміргіштермен жанасудан аулақ болу, олардың мекендейтін жерлеріне бармау; - кеміргіштер ластаған болуы мүмкін тағамдар мен суды тұтынбау; - стихиялық және көше саудасы орындарында тамақтанбау, тағамдарды тығыз жабылған ыдыста сақтау; - жабық үй-жайларда алдын ала желдету және дезинфекциялық құралдармен дымқыл тазалау жүргізу, тазалау кезінде қолғап пен маска қолдану; - адам көп жиналатын жерлерде қашықтықты сақтау, маска мен дезинфекциялық құралдарды қолдану, қол гигиенасын сақтау.
Ведомство сондай-ақ сапардан оралғаннан кейін 1-8 апта ішінде дімкәстік, жоғары температура, қатты әлсіздік, бұлшықет ауруы, жөтел немесе ентігу пайда болса, шұғыл түрде дәрігерге қаралып, шетелде болғаны туралы хабарлау қажеттігін атап өтті.
Еске салайық, өлімге әкелетін қауіпті хантавирус өршіп, Нидерландтың MV Hondius круиздік лайнерінде орын алды, ол Аргентинадан Кабо-Вердеге бет алған еді. Үш адам қайтыс болды. 12 мамырда ДДҰ хантавирус тудырған 11 ауру жағдайы анықталғанын хабарлады, оның тоғызында Андес вирусы жұқтыруы расталды.
