Алматыда жол қауіпсіздігін бақылаудың жаңа форматы енгізілді: түнгі «тарылту» учаскелері мен сүзгілік бекеттер
Алматыда жол қауіпсіздігін бақылаудың жаңа форматы енгізілді. Жаңа тәсіл түнгі уақытта негізгі магистральдарда арнайы учаскелер құруды көздейді: қозғалыс бөлігі уақытша тарылып, «бөтелке мойны» қағидаты бойынша көлік ағыны баяулатылады.
Қалай жұмыс істейді Полицияның түсіндіруінше, мұндай тарылту көлік қозғалысын баяулатып, жүргізушілерді іріктеп тексеруге мүмкіндік береді. Тексеру барысында, оның ішінде, көлікті мас күйде басқару фактілеріне ерекше назар аударылады.
Полиция мәліметінше, осындай бекеттердің бірі өткен демалыс күндері ВОАД-та жұмыс істеген. Қозғалыс қауіпсіздігін қамтамасыз ету үшін уақытша жол белгілері орнатылған: жылдамдықты 40–60 км/сағ дейін шектеу, кедергіні айналып өту белгісі және жолдың тарылуы туралы ескерту.
Бұл схема әлемде кеңінен қолданылады және road checkpoints немесе sobriety checkpoints форматы ретінде белгілі. Мұнда көліктердің барлығы бірдей тоқтатылуы мүмкін немесе белгілі бір алгоритм бойынша — мысалы, әр екінші не үшінші көлік. Мұндай тәсіл тексерудің субъективтілігін азайтып, оны жүйелірек етеді.
Алматы қаласы әкімшілік полиция басқармасының бастығы Абдинур Тасыбаевтың айтуынша, сүзгілік бекеттер жол-көлік оқиғаларының алдын алудың заманауи әрі тиімді әдістерінің бірі саналады. Оның сөзінше, қозғалыс бөлігін жасанды тарылту ағын жылдамдығын төмендетіп, жүргізушілерді апаттық жағдай туындатпай бақылауға мүмкіндік береді. Сондай-ақ ол мас күйде көлік басқару ауыр жол апаттарының негізгі себептерінің бірі екенін атап өтіп, бірнеше күн ішінде ондаған мас жүргізуші ұсталғанын және бұл бағыттағы жұмыс жалғасатынын айтты.
Халықаралық тәжірибе Еуропа елдерінде мұндай рейдтер, ең алдымен, мас күйдегі жүргізушілерді анықтау үшін қолданылады және тиімді алдын алу шарасы ретінде бағаланады. Зерттеулерде жолдағы тұрақты тексерулер бақылаудың «болмай қоймайтын» әсері арқылы апаттар мен құқықбұзушылықтардың азаюына ықпал ететіні көрсетіледі.
Физикалық тұрғыда схема былай ұйымдастырылады: жол конустармен немесе уақытша қоршаулармен тарылтылып, көлік «бір ағынмен» баяу қозғалады, ал полиция қызметкерлері жүргізушілерді кезекпен тексереді. Күдік тудырмаған жағдайда, жүргізушілердің басым бөлігі бірнеше секундқа ғана кідіртіледі.
Мұндай шаралардың негізгі мақсаты — жаппай айыппұл салу емес, тұрақты бақылау бар деген сезімді қалыптастыру. Халықаралық тәжірибе бойынша, дәл осы фактор жүргізушілердің мінез-құлқын өзгертіп, қауіпті маневрлер мен жол ережесін бұзу жағдайларын азайтады.
Рейдтердің нәтижелері Осы аптада Алматыда және облыста ауқымды тексерулер жүріп жатыр. Алматыда ОПМ «Стоп-нарушение» өткізілген бес күн ішінде 9820 құқықбұзушылық анықталған. Ең елеулілерінің қатарында:
- мас күйде көлік басқарудың 43 дерегі;
- жүргізуші куәлігі жоқ 78 жүргізуші;
- бұрын көлік басқару құқығынан айырылған 12 жүргізуші;
- жалған мемлекеттік нөмір қолданудың 14 фактісі;
- қарсы қозғалыс жолағына шығудың 36 дерегі.
Барлығы 3 666 автомобиль айыптұраққа жіберілген.
21 наурыздағы жол апаты Еске салайық, 21 наурызда Алматыда резонанс тудырған жол-көлік оқиғасы болды. Әл-Фараби мен Мендикулов көшелерінің қиылысында Mercedes пен Zeekr көліктері соқтығысқан. Апат салдарынан үш адам қаза тапты: 29 жастағы жүргізуші және Mercedes көлігіндегі 20 және 22 жастағы екі жолаушы қыз оқиға орнында көз жұмды. Zeekr жүргізушісі тірі қалып, жарақатпен ауруханаға жеткізілген. Апат кезінде оның мас болғаны айтылды.
Сонымен қатар, мемлекеттік нөмір белгілерінің ықтимал заңсыз берілуі туралы уәждер бойынша ішкі қауіпсіздік департаменті қылмыстық іс қозғап, бірқатар лауазымды тұлғалар қызметінен айырылған.
Кейін қалаға Астана, Ақмола, Қарағанды және Жамбыл облыстарынан экипаждар тартылған. ІІМ мәліметінше, қосымша күштер жолдардағы тәртіп пен қауіпсіздікті бақылау үшін жұмылдырылған.
