Павлодарда балабақша тәрбиешісі балаларды ұрды деген іс бойынша сот үкімі шықты
Павлодарда балабақша тәрбиешісіне қатысты іс бойынша сот үкімі шығарылды. Оны ата-аналар балабақша тәрбиеленушілерін ұрды деп айыптаған.
Не болды Жанжал 2025 жылғы маусымда басталды. Үш жастағы балалардың ата-аналары әлеуметтік желілерде бейнебақылау камераларынан алынған жазбаларды жариялаған.
Резонанс тудырған кадрларда тәрбиеші балаларды шашынан тартып, итеріп, шапалақтап, ұрып жатқан көрінеді. Оқиғалар тәрбиеленушілерді киіндіріп-шешіндіру кезінде киім ауыстыратын бөлмеде болған. Іс бойынша 16 бала жәбірленуші деп танылды.
Тәрбиешіге қандай айып тағылды 33 жастағы павлодарлық әйелге Қылмыстық кодекстің 140-бабы («Кәмелетке толмағанды тәрбиелеу жөніндегі міндеттерді тәрбиелеу мекемесінің қызметкері тарапынан тиісінше орындамау, қатыгездікпен қараумен ұштасқан») және 110-баптың 2-бөлігінің 1 және 2-тармақтары («Азаптау») бойынша айып тағылды.
Сотта айыпталушы кінәсін толық мойындап, зардап шеккен балалардың ата-аналарынан кешірім сұраған.
Сот қандай шешім қабылдады Сот талқылауы барысында бейнежазбалар, ата-аналардың көрсетулері және істің өзге материалдары зерттелді.
Сот әйелді кінәлі деп танып, 4 жыл 6 айға бас бостандығынан айыру жазасын тағайындады. Алайда сотталған адамның үш кәмелетке толмаған баласы бар екенін, олардың ең кішісі бес айлық екенін ескеріп, жазаны орындауды бес жылға кейінге қалдырды.
Сондай-ақ сот-медициналық сараптамалардың қорытындысына сәйкес, үш баладан көгерулер мен сыдырылулар анықталған.
Сот жеңілдететін мән-жайлармен қатар, ауырлататын мән-жайларды да есепке алып, қылмыстық құқық бұзушылықтың қызметтік міндеттерін атқару кезінде жасалғанын көрсеткен.
Ата-аналар үкімге шағымданбақ Жәбірленуші тараптың ата-аналары үкіммен келіспейтінін айтып, оны шағымдануға ниетті екенін мәлімдеді.
Ата-аналар моральдық зиянды өтеуді талап еткен, көпшілігі оны 10 миллион теңгеге бағалаған. Алайда сот талаптарды ішінара қанағаттандырып, сотталғаннан жәбірленушілердің бір бөлігіне 400 мың теңге, ал қалғандарына әрқайсысына 300 мың теңгеден өндіруді міндеттеген.
