Алуа Нурман Магнус Карлсенмен болған селфи оқиғасына қатысты пікір білдірді
Қазақстандық шахматшы Алуа Нурман Германияда өткен фристайл-шахмат турнирі Grenke Freestyle Open аясында әлем чемпионы Магнус Карлсенмен ойнаған сәтінен алған әсерін бөлісіп, әлеуметтік желіде талқыланған селфи оқиғасына қатысты пікірін айтты.
Әлеуметтік желілерде турнирден түсірілген бір эпизод кең тарады. Партия алдында Алуа Нурман Карлсеннен бірге суретке түсуді сұраған, ал чемпион келісім берген. Алайда содан кейін Магнус бақылаушыларға қазақстандық шахматшының жанында ұялы телефоны бар екенін хабарлаған.
Алуа Нурманның айтуынша, ол бұл әрекетті жеңілдікпен қабылдаған. Шахматшы селфиден кейін телефонын қайда қою керегіне алаңдағанын, ал бақылаушылар телефонды өздеріне тапсыруды сұрағанда, өзін тыныш сезінгенін жеткізді.
"Басында, әрине, ол төрешіні шақырғанда аздап қобалжыдым, бірақ телефонды алып қоюды тіпті жеңілдікпен қабылдадым. Өйткені турға дейін басқа бір төрешіден селфиден кейін телефонды қайда қою керегін нақтылап сұрадым, ол сөмкеме салуға болады, тек оны ашпауым керек деді. Осы оқиғадан кейін бұл жөнінде артық уайым қалмады", — деді Алуа Нурман.
Материалда Магнус Карлсеннің қарсыластарының жанындағы артық заттарға өте мұқият, кейде "паранойяға" жақын деңгейде қарайтыны айтылған. Мысал ретінде, өткен жылдың сәуірінде Германиядағы Grenke Chess турнирінде Карлсен бақылаушылардан қарсыласы — израильдік шахматшы Виктор Михалевскийдің аналог сағатын алып қоюды сұрағаны келтірілген.
Нурман Карлсенді түсінетінін және оның әрекетін орынды санайтынын айтты.
"Иә, бұл орынды әрі қазіргі уақытта өзекті, өйткені қарсыластан не күтеріңді ешқашан білмейсің. Менің жағдайымда Магнус телефонның өшірулі екеніне көз жеткізгісі келді деп ойлаймын, өйткені мен оның жанымда бар екенін жасырған жоқпын", — деп пікір білдірді шахматшы.
Материалда бастапқыда Қазнеттегі реакция белгілі бір деңгейде қате болғаны, кейбір қолданушылар норвегиялықты "донос" жасады деп айыптағаны да атап өтіледі. Алайда әлеуметтік желідегі турнир регламентін білетіндер бұл әрекет Нурманға көмектескенін түсіндірген: аталған турнирде телефон қолдану дисквалификацияға әкелуі мүмкін.
Қазақстандық шахматшы бұл пікірмен де келіскен.
"Иә, солай деуге болады. Әрине, ол мұны кейбіреулерге қатқыл көрінген өз стилінде жасады, бірақ бұл кәсіби түрде және ереже бойынша болды. Ол әрдайым қандай болса, сондай, жаман нәрсе ойлады деп есептемеймін", — деп қосты Алуа Нурман.
Шахматшының айтуынша, ол бұл жағдайды Магнус Карлсенмен талқылап үлгермеген: партиядан кейін оларды бірден "әртүрлі сұхбаттарға бөліп жіберген". Дегенмен Нурман бұл соңғы кездесу емес екенін, әлі сөйлесуге мүмкіндік болатынын сезетінін айтты.
Оқиғаға қатысты ресми пікір
Жағдай қоғамда кең талқыланғаннан кейін Қазақстан шахмат федерациясынан пікір алынған. Федерацияның баспасөз қызметі оқиғаның аяқталғанын және қатысушылардың ешқайсысы жазаға тартылмағанын мәлімдеді.
"Германиядағы Grenke Chess Festival турнирі кезінде Алуа Нурман Магнус Карлсенмен селфи жасау үшін ойын залына смартфон алып кірді. Магнус Карлсен фотоға келісім берді. Осыдан кейін төреші жарыс ережелеріне сәйкес спортшының телефонын алып, ескерту жасады. Турнир ережелері сақталды. Оқиға аяқталды, қосымша санкциялар жоқ. Алуа Нурман турнирдегі өнерін жалғастырып жатыр", — делінген КФШ мәлімдемесінде.
Сондай-ақ материалда Grenke Freestyle Open турнирінде Алуа Нурман әйелдер арасында екінші орын алғаны және 2027 жылы өтетін фристайл бойынша алғашқы әлем чемпионатына жолдама жеңіп алғаны көрсетілген. Бұл жолдамалардың барлығы 8 ғана болғаны да атап өтіледі.
