Сабыржан Аккалыков Азия чемпионатының жартылай финалына шықты
Моңғолияның Улан-Батор қаласында өтіп жатқан бокстан Азия чемпионатында қазақстандық боксшы Сабыржан Аккалыков жартылай финалға шықты.
Ширек финалда 75 келіге дейінгі салмақ дәрежесінде Аккалыковқа Жапония өкілі Тайга Яги қарсылас болды. Жекпе-жек толық үш раундқа созылып, төрешілер шешімімен Сабыржан Аккалыковтың 5:0 есебімен жеңісімен аяқталды.
Жартылай финалда Аккалыков Моңғолиядан Далай Ганзоригпен жұдырықтасады.
Осы нәтижемен Сабыржан Аккалыков Азия чемпионатының жартылай финалына өтіп, өзіне кемінде қола медальді қамтамасыз етті.
Аккалыков бұған дейін юниорлар арасында әлем чемпионы атанған, сондай-ақ Астанада өткен Әлем кубогы кезеңінде жеңіске жеткен. 2025 жылы ол Дубайда өткен IBA ұйымдастырған әлем чемпионатында күміс медаль иеленді.
Бұған дейін Қазақстан құрамасының өкілі Айгерім Саттыбаева да бокстан Азия чемпионатының жартылай финалына шыққан еді.
Сондай-ақ кеше жартылай финалға қазақстандықтар Ертуған Зейнуллинов, Валентина Хальзова, Айбек Оралбай және Оразбек Асылкулов өтті.
