Алматыда Сәтпаев көшесін ВОАД-қа дейін ұзартуға арналған жобалау конкурсы жарияланды
Алматыда Сәтпаев көшесін Шығыс айналма автомобиль жолына (ВОАД) дейін ұзартуға арналған жобалау жұмыстары жоспарланып отыр. Мемлекеттік сатып алу порталында осыған қатысты лот жарияланды.
Не болды Алматы қаласының мемлекеттік активтер басқармасы Сәтпаев көшесін Луганский көшесінен ВОАД-қа дейінгі учаскеде «пробивка» жасауға арналған жобалау-сметалық құжаттаманы (ЖСҚ) әзірлеу бойынша конкурс жариялады.
Лот деректеріне сәйкес, тек ЖСҚ әзірлеуге 359 миллион теңге (ҚҚС-сыз) бөлінген. Тапсырыс беруші ретінде қаланың жол инфрақұрылымын дамыту басқармасы көрсетілген. Конкурс рейтингілік-балдық жүйе форматында өтеді.
Мемлекеттік сатып алу порталының мәліметінше, өтінімдерді қабылдау 11 наурыз күні сағат 09:00-де басталып, 16 наурыз күні 09:30-ға дейін жалғасады. Бұған дейін конкурс 6–13 наурыз аралығына жоспарланған.
Іске асыру мерзімдері Техникалық ерекшелікте жобаның дедлайндары көрсетілген: жобалаушылар ЖСҚ әзірлеуді аяқтап, мемлекеттік сараптамадан 2027 жылғы 30 маусымға дейін өтуі тиіс.
Жолдың ұзындығы жобалау-сметалық құжаттаманы әзірлеу барысында анықталатыны нақтыланған.
Жобаның негізгі талаптары Техникалық ерекшелікке сәйкес, болашақ жол бірінші (жоғары) жауапкершілік деңгейіне жатады.
Жобалаушылар инженерлік жұмыстарды, оның ішінде инженерлік-техникалық ізденістерді, геодезиялық, геологиялық және гидрологиялық зерттеулерді жүргізуі қажет.
**Жоспарланған нысандар:**
- Луганский көшесінен ВОАД-қа дейін трассаны «пробивка» жасау;
- Шығыс айналма жолымен қиылыста көлік айрығын салу;
- жаңа тротуарлар мен жарықтандыру жүйесін орнату;
- жаяу жүргіншілер өткелдері;
- еріген қар суынан және су басудан қорғайтын қорғаныс құрылыстары.
Құжаттамада құрылыс кезеңінде көлік қозғалысын ұйымдастыру схемасын қолданыстағы көлік схемасын мүмкіндігінше аз бұза отырып әзірлеу қажеттігі атап өтілген.
Сондай-ақ мамандар болашақ жол орналасатын ауданның 9 баллға дейінгі сейсмикалық белсенділік аймағында екенін ескеруі тиіс. Құжатта жобалау кезінде құрылыс аймағына түсетін жасыл желектерге орман-патологиялық тексеру жүргізу қажеттігі де көрсетілген.
Егер сараптама ескертулер анықтаса, жобалаушы оларды түзетуге міндетті. Теріс қорытынды болған жағдайда да ол жобаны қайта пысықтау мен қайта сараптамадан өткізуді өзі төлейді.
Бұған дейінгі мәлімет Бұған дейін 2026 жылы Алматы әкімдігі бірнеше негізгі қалалық магистральді ұзартуды аяқтауды жоспарлап отырғаны жазылған.
Олардың қатарында:
- Саин көшесі – 3,2 км (70 пайызы дайын),
- Абай даңғылы қала шекарасына дейін – 0,6 км (қозғалыс ашық, 95 пайызы дайын),
- Рысқұлов – 2,3 км (15 пайызы дайын).
Ішкі магистральдық Төле би көшесінде 4,5 км салынып жатыр (45 пайызы дайын).
Қаланың жол инфрақұрылымын дамыту басқармасы бұған дейін құрылыс-монтаж жұмыстары жер телімдерін сатып алу аяқталған сайын жүргізіліп жатқанын хабарлаған.
**Оқыңыз:** Саин және Рысқұлов көшелерін «пробивка» жасау: әкімдіктің уәдесі
