Алматыда 12 жастағы балаға зәр шығарудың ауыр бұзылысы кезінде имплант-нейростимулятор орнатылды
Алматыда зәр шығарудың ауыр бұзылысы бар пациентке жүйкелер мен қуық арасындағы байланысты қалпына келтіретін имплант-нейростимулятор орнатылды.
Не болды Алматы қаласының Балаларға шұғыл медициналық көмек көрсету орталығының хирургия бөліміне 12 жастағы бала түсті. Ол іштің төменгі бөлігіндегі қатты ауырсынуға, зәр шығарған кезде жағымсыз сезімдерге және зәрдің іркілуіне шағымданған.
Тексеру нәтижесінде зәр шығару жүйесінің туа біткен аномалиясына байланысты күрделі диагноз анықталды. Бұған дейін бала уретероцистонеостомия бойынша операциядан өткен.
Дәрігерлер қандай шешім ұсынды Орталықтың баспасөз қызметі баланың қуық пен ми арасындағы қалыпты байланысы іс жүзінде болмағанын түсіндірді. Мәселені шешу үшін дәрігерлер сакральды нейромодуляция әдісін қолдануды ұсынған. Бұл тәсіл аталған өзара әрекеттестікті қалпына келтіруге көмектеседі.
Нейростимулятор — бел аймағында тері астына орнатылатын шағын құрылғы.
Бөлімше меңгерушісі, нейрохирург Рахым Аханның айтуынша, операция кезінде электрод сакральды жүйке өрімі аймағына қойылып, нейростимулятор тері астына имплантацияланған. Құрылғы генераторы әлсіз электр импульстарын беріп, қуық жұмысына жауап беретін жүйкелерді ынталандырады, соның арқасында оның қызметі қалпына келуі мүмкін.
Операция шамамен бір сағатқа созылды. Оны нейрохирург Рахым Ахан мамандар тобымен бірге жүргізді. Анестезиолог — Нургуль Оразбаева.
Құрылғының қызмет ету мерзімі бес–жеті жылды құрайды, содан кейін батареясын жоспарлы түрде ауыстыру қажет болады.
