Алматыда көлік салығы бойынша берешекті өндіріп алу үшін бірлескен рейдтер өтіп жатыр
Алматыда көлік салығы бойынша берешекті өндіріп алу үшін бірлескен рейдтік іс-шаралар өткізіліп жатыр.
Мемлекеттік кірістер департаментінің мәліметінше, «Борышкер» жедел-алдын алу іс-шарасы полициямен және Жеке сот орындаушыларының өңірлік палатасымен бірлесіп ұйымдастырылған.
Жұмыс қала әкімінің көлеңкелі экономиканы төмендету және бюджетке түсімдердің толық түсуін қамтамасыз ету жөніндегі іс-шаралар жоспары аясында жүргізілуде.
Рейд барысында жеке сот орындаушыларының қаулылары бар борышкерлердің көліктері «Сергек» камералары арқылы анықталып, қарыз толық өтелгенге дейін айыптұраққа жіберіледі.
Қазіргі таңда Алматыда көлік салығы бойынша берешек 7 миллиард теңгеден асады. Бұл — 85 024 салық төлеушіге қатысты дерек.
Сонымен қатар берешектің негізгі бөлігі қозғалтқыш көлемі үлкен, яғни 4000 текше сантиметрден жоғары көліктерге тиесілі.
Алматы қаласының мемлекеттік кірістер департаменті көлік иелерін берешекті мүмкіндігінше тезірек өтеуге шақырды. Бұл көліктің айыптұраққа жіберілуінен және сот орындаушылары қызметіне байланысты қосымша шығындардан сақтануға мүмкіндік береді.
Бұған дейін көлік салығын уақытында төлемеудің салдары қандай болуы мүмкін екені туралы айтылған.
Сондай-ақ қазақстандықтарда көлік салығын есептеу бойынша сұрақтар туындағаны және бұл мәселеге қатысты түсіндіру берілгені хабарланған.
Қытай көліктері Қазақстан жолдарын жаулап алды! Ал сен оларды ажырата аласың ба? Біз көмектесеміз! Біздің қытай автокөліктері әлемі арнайы жобасына кір — маркалар, брендтер және өндірушілер туралы бәрі осында!
