Ұлыбритания 8 сәуірден бастап визалық консулдық алымдарды қымбаттатты
Егер Лондонда серуендеуді немесе британдық жоғары оқу орнында оқуды жоспарлаған болсаңыз, сапар бюджетін қайта қарауға тура келеді. 8 сәуірден бастап Ұлыбритания көпшілік виза санаттары бойынша консулдық алымдардың құнын арттырды.
Өзгерістер қарапайым туристерге де, студенттерге, транзиттік жолаушыларға және тұрақты тұруға (ПМЖ) көшетіндерге де әсер етті. Жаңа тарифтер ел үкіметінің сайтында жарияланған. Орта есеппен тарифтер 6–8 пайызға өскен.
Ең танымал санат — 6 айлық қысқамерзімді виза — енді саяхатшыларға 135 фунт стерлинг (шамамен 83 мың теңге) болады. Бұған дейін оның құны 127 фунт болған.
Ұзақ мерзімге рәсімдеуді қалайтындар үшін бағалар төмендегідей өзгерді:
- 2 жылдық виза: 475-тен 506 фунт стерлингке дейін қымбаттады (шамамен 311 мың теңге);
- 5 жылдық виза: құны 848-ден 903 фунт стерлингке дейін өсті (шамамен 556 мың теңге);
- 10 жылдық виза: ең айқын қымбаттау — баға 69 фунтқа өсіп, 1128 фунт стерлинг болды (шамамен 694 мың теңге).
Жаңа ережелер тек туристерге ғана қатысты емес. Студенттік виза енді 558 фунт стерлинг (шамамен 344 мың теңге) тұрады. Бүгінге дейін оның құны 524 фунт болған.
Жұмыс визалары бойынша да өсім тіркелді:
- 3 жылға дейін: 769-дан 819 фунт стерлингке дейін (шамамен 504 мың теңге);
- 3 жылдан жоғары: 1519-дан 1618 фунт стерлингке дейін (шамамен 996 мың теңге).
Транзиттік визалар да қымбаттады:
- әуе арқылы транзиттік виза — 41,5 фунт стерлингке дейін (шамамен 26 мың теңге);
- жерүсті транзит — 74,5 фунт стерлингке дейін (шамамен 46 мың теңге).
Жеңілдетілген кіруге құқығы бар елдердің азаматтары үшін электронды рұқсаттың (ETA) құны да 4 фунтқа өсіп, енді 20 фунт стерлинг (шамамен 12 мың теңге) болды.
Өзгерістер ұзақмерзімді көші-қон рәсімдеріне де әсер етті.
Кіруге мерзімсіз рұқсат үшін алым 3226 фунт стерлингке дейін өсті (шамамен 1,99 миллион теңге).
Натурализация арқылы азаматтық рәсімдеу енді 1709 фунт стерлинг (шамамен 1,05 миллион теңге) болады.
Еске сала кетейік, өткен жылдың күзінде Ұлыбритания көші-қон саясатын едәуір қатаңдататыны белгілі болған. Ұлыбританиядағы босқындар енді елде 20 жыл тұрғаннан кейін ғана тұруға ықтиярхатқа өтініш бере алады.
