Қызылордада Саяхат шағынауданында канал бойында құрғақ шөп пен ағаштар өртенді, кінәлі адам анықталды
Қызылордада ірі өрт шықты: Саяхат шағынауданында Сталин каналы бойында құрғақ шөп, ағаштар мен бұталар жанған.
Өрт туралы хабар Қызылорда облысының ТЖД-ның "112" пультіне түскен.
Ведомство мәліметінше, алғашқы өрт сөндіру бөлімшелері келген кезде шөп жамылғысы, ағаштар және қалың өсімдіктер қарқынды жанып, оттың жақын маңдағы әкімшілік және жеке ғимараттарға тарау қаупі байқалған.
Құтқарушылар канал бойындағы жану ошақтарын сөндіру үшін қайықтарды пайдаланып, өртті жедел түрде толық жойған және оттың маңайдағы құрылыстарға өтуіне жол бермеген.
Жүргізілген іс-шаралар барысында өрттің кінәлі тұлғасы анықталған. Оған қатысты Қазақстан Республикасының Әкімшілік құқық бұзушылық туралы кодексінің 336-бабы бойынша әкімшілік хаттама толтырылған.
Анықтама: ҚР ӘҚБтК-нің 336-бабы — "Қалдықтарды жинақтау немесе жағу кезінде атмосфералық ауаны қорғау және өрт қауіпсіздігі талаптарын сақтамау" — құрғақ шөпті, жапырақты, қоқысты өртеу және экологиялық нормаларды бұзу үшін жауапкершілік қарастырады.
ТЖМ өрт қауіпсіздігі ережелерін сақтаудың, құрғақ өсімдіктерді әдейі өртемеудің және ашық от көздерін қараусыз қалдырмаудың маңызын еске салды.
