Қазақстанда көмір генерациясын дамытуға арналған ұлттық жоба бекітілді: жаңа жұмыс орындары мен жеңілдетілген ипотека қарастырылған
Қазақстан Үкіметі елдегі көмір генерациясын дамытуға арналған Ұлттық жобаны бекітті. Жоба аясында жаңа жұмыс орындары құрылып, соның ішінде шамамен 4,5 мың тұрақты жұмыс орны ашылады.
Ұлттық жоба шеңберінде көмір электр станциялары қызметкерлеріне арналған жаңа жеңілдетілген ипотека енгізіледі. Бағдарламаны іске асыру Отбасы банкке жүктеледі.
Сонымен қатар, салалық жоғары оқу орындарының базасында мамандарды жүйелі даярлау және біліктілігін арттыру қарастырылған.
Жаңартылған энергожүйенің тұрақты жұмысын қамтамасыз ету үшін жоба өндіруші және көлік салаларымен синхрондалған. 2030 жылға қарай энергетикалық көмірге қосымша сұраныс жылына шамамен 20 миллион тонна болады деп күтіледі. Осыған байланысты Ұлттық жоба:
- жартылай вагондар паркін кеңейтуді (тәулігіне қосымша 600 бірлік),
- теміржол инфрақұрылымын жаңғыртуды,
- ішкі қажеттіліктер үшін отынды тасымалдауға болжамды тарифтік дәліздерді енгізуді көздейді.
Ұлттық жобаны іске асыру Қазақстанның энергетикалық егемендігін нығайтуға және отандық машина жасау саласына мультипликативті әсер беруге бағытталған. Бұл ел аумағында қазандық агрегаттарын, трансформаторларды және автоматтандыру жүйелерін өндіруді ынталандыруға тиіс.
Нәтижесінде көмір генерациясы ұзақ мерзімді экономикалық өсімге негіз болатын жоғары технологиялы әрі экологиялық жауапты секторға трансформациялануы жоспарланып отыр.
