Қарағандыда «Таза Қазақстан» аясында көшелерді «генералдық тазалау» қағидатымен ретке келтіру басталды
Қарағандыда қыстан кейін көшелерді ретке келтіру жұмыстары «генералдық тазалау» қағидаты бойынша ұйымдастырылмақ. Жаңа тәсіл республикалық «Таза Қазақстан» акциясы аясында енгізіліп жатыр.
Қалалық әкімдіктің мәліметінше, негізгі идея — бір көшеге қайта-қайта оралмай, барлық жұмысты бірден толық орындау, соның ішінде жол бөлігін жууға дейін жеткізу. Бір учаскеге бір мезетте барлық қызметтер шығады.
Пилоттық жобаға алғаш болып Қазыбек би атындағы ауданның Жангозин көшесі енгізілді. Одан кейін Аханов және Шакиров көшелерінде осындай формат қолданылмақ. Кейін бұл тәсілді бүкіл қалаға масштабтау жоспарланып отыр.
Қалалық әкімдікте «генералдық тазалау» сценарийі жақсы жолға қойылған конвейерді еске салатыны айтылды. Алдымен құрғақ және апатты бұтақтарды, сондай-ақ өскіндерді кесетін бригадалар жұмысқа кіріседі. Одан кейін — жарықтандыру мамандары. Кейін тротуарларды сыпыратын жұмысшылар шығады. Соңында — жол коммуналдық техникасы іске қосылады. Сонымен қатар қоқыс шығаруға жауапты коммуналдық қызметкерлер де тартылады. Жол бойындағы контейнер алаңдары тек тазартылып, аумағы ретке келтіріліп қана қоймай, дезинфекцияланады.
Қазыбек би атындағы аудан әкімі Ералы Оспанов бұл жұмыстың бір реттік шара емес екенін атап өтті.
«Бұл бір реттік акция емес, тиімділікті арттыруға және қалалық ортаны күтіп ұстау сапасын жақсартуға бағытталған жаңа жұмыс форматы. „Таза Қазақстан“ акциясы аясында көшелерді тазалауға кешенді түрде келу туралы шешім қабылданды. Бүгін пилоттық жоба басталады. Басқа көшелерде де осылай жұмыс істейтін боламыз», — деді ол.
Аудан басшысы техниканың жұмысына жол жиегіндегі көліктер кедергі келтірсе, мәселе полицияның көмегімен шешілетінін де айтты: жол уақытша жабылып, көлік иелері табылғаннан кейін тазалау жалғасады.
Аудан әкімінің сөзінше, «генералдық тазалаудан» кейін коммуналдық қызметтер көшелерге қайта оралуға дайын: тұрғындардың өтініштері бойынша да, сондай-ақ түнгі рейдтер аясында да жаңа мәселелерді жедел жою жоспарланған.
Сондай-ақ Қарағандыда коммуналдық техника паркі қалыптастырылғаны және оның тұрақты түрде жаңартылып отыратыны хабарланды. Қазыбек би атындағы ауданда қазір үш жол шаңсорғышы жұмыс істейді, сондай-ақ тротуар жуатын машиналар бар.
