Иран парламенті Ормуз бұғазындағы кеме қатынасын бақылаудан түсетін табысты бағалады
Иран парламентінде Ормуз бұғазындағы кеме қатынасын бақылау, басқару және реттеуден түсетін жылдық кіріс 10–15 миллиард доллар деңгейінде бағаланды. Бұл туралы ел парламентінің мүшесі мәлімдеді.
Парламент президиумының мүшесі Иранның Ормуз бұғазындағы егемендігін нығайту ұлттық валюта — риалды күшейтуге бағытталуы тиіс екенін айтты.
Сонымен қатар, жарияланымда Тегеранның бұғазда реттеуші болуға ұмтылатыны, ал «кедергі келтіру және бопсалаумен айналысу» мақсатын көздемейтіні жазылған.
Ормуз бұғазын бақылаудан түсетін әлеуетті кіріс, егер кемелердің өтуі үшін алым енгізілсе, өте жоғары болуы мүмкін деп бағаланады.
Ирандық БАҚ-тың пайымдауынша, жыл сайын бұғаз арқылы өтетін шамамен 32 мың кеменің әрқайсысынан 2 миллион доллар көлемінде төлем алынған жағдайда, Тегеран жылына шамамен 64 миллиард доллар табыс табуы мүмкін.
Ормуз бұғазы АҚШ пен Израильдің әскери операциясы басталғаннан кейін Иран тарапынан бұғатталған. 8 сәуірге қараған түні Иран мен АҚШ екі аптаға атысты тоқтату туралы жариялады. 11 сәуірде Пәкістанда тараптардың келіссөздері өтіп, ол сәтсіз аяқталды.
