Алматыда зейнеткер алаяқтардың арбауына түсіп, шамамен 4 млн теңге аударғаннан кейін көшеде көз жұмды
Алматыдағы зейнеткердің туыстарының айтуынша, ер адам алаяқтардың арбауына түсіп, оларға қомақты қаражат аударған. Сол күні кешке ол жедел жәрдем келгенге дейін көшеде көз жұмды.
Марқұмның жақындарының мәліметінше, 21 наурыз күні таңертең ол базарға барған және сол жерде алаяқтардың ықпалына түсуі мүмкін. Туыстары оны қала ішінде және банкоматтар бойынша алып жүрген болуы ықтимал деп болжайды. Ер адам ақша шешіп, сегіз адамның шотына шамамен 4 миллион теңге аударған.
Қайтыс болған адамның немересі өз үндеуінде атасының қоңырауларға жауап бермегенін, алайда кезекті қоңырауға белгісіз ер адам жауап беріп, телефонды атасына бергенін айтты. Оның сөзінше, телефонның арғы жағынан бөгде дауыстар естілген.
Немересінің айтуынша, соңғы телефон әңгімесі кезінде атасы аялдамаға бара жатқанын айтқан. Оның алаяқтар болған-болмағаны туралы сұрағына ол растай жауап берген, содан кейін өзін жайсыз сезініп, көшеде құлаған. Өтіп бара жатқан адамдар алғашқы көмек көрсетіп, жедел жәрдем шақырған, бірақ ер адам дәрігерлер келгенге дейін қайтыс болған.
Алматы полиция департаменті бұл дерек бойынша қылмыстық іс қозғалғанын хабарлады.
"Қазіргі уақытта күдіктілердің жеке басын анықтауға және оларды кейіннен ұстауға бағытталған жедел-тергеу іс-шараларының кешені жүргізілуде", — делінген полиция хабарламасында.
Марқұмның немересі атасына көмектесуге тырысқан жандардың барлығына алғыс айтып, осы оқиғаға қатысты бірдеңе білетін немесе көрген адамдардан хабар беруін сұрады.
Бұған дейін Ақмола облысының Қосшы қаласында жергілікті зейнеткер әйел де алаяқтық схеманың құрбаны болған. Ол интернеттен жылдам әрі қомақты табыс уәде еткен инвестициялық жоба жарнамасына тап болғаннан кейін, нәтижесінде алаяқтарға 10 миллион теңге берген.
