Талдықорғанда көлік мопедті қағып, екі жасөспірім ауыр халде жансақтау бөлімінде жатыр
Талдықорғанда кеше жоғары жылдамдықпен келе жатқан автокөлік мопедті қағып кеткен. Мопедте екі жасөспірім болған.
Жол-көлік оқиғасы Жансүгірова және Балпық би көшелерінің қиылысында болған. Видеода Toyota Camry соқтығыс сәтінде бағдаршамның тыйым салатын сигналына қарамастан қозғалғаны байқалады.
Жетісу облысының денсаулық сақтау басқармасы зардап шеккендердің жағдайы туралы мәлімет берді. Ведомствоның хабарлауынша, 2007 жылы туған пациенттер жол-көлік оқиғасынан кейін 2 сәуір 2026 жылы сағат 01:06-да шұғыл түрде жеткізілген.
Қазіргі уақытта олар анестезиология, реанимация және қарқынды терапия бөлімінде жатыр.
Медициналық қызметтің мәліметінше, пациенттердің жағдайы өте ауыр деп бағаланады. Екеуі де тәулік бойы медицина қызметкерлерінің бақылауында, толық көлемде қарқынды терапия жүргізіліп жатыр. Қажетті медициналық көмек қолданыстағы хаттамаларға сәйкес көрсетілуде.
Бұған дейін Алматыда резонанс тудырған жол апаты болып, салдарынан үш адам қаза тапқан.
Сондай-ақ Алматыда өткен «Стоп-нарушения» ауқымды жедел іс-шарасының екі күнінде 4 мың 828 құқықбұзушылық анықталған.
