Алматыда «Стоп-нарушение» ОПМ: сегіз күнде шамамен 15 мың жол ережесін бұзу анықталды
Алматыда «Стоп-нарушение» ОПМ аясында сегіз күн ішінде жол қозғалысы ережелерін бұзудың шамамен 15 мың дерегі анықталды. Тіркелген құқықбұзушылықтардың едәуір бөлігі жолдағы өрескел әрі әлеуетті қауіпті әрекеттермен байланысты.
Полиция мәліметінше, осы уақыт аралығында 4,7 мыңнан астам автокөлік мамандандырылған айыптұрақтарға жіберілген.
Алматы қалалық полиция департаменті бастығының орынбасары Ғалым Сарғұловтың айтуынша, бақылау күшейтілгеніне қарамастан, жолдағы жағдай адам факторына байланысты әлі де күрделі күйінде қалып отыр. Оның сөзінше, полиция тек өрескел жол ережесін бұзуды ғана емес, сондай-ақ агрессивті жүргізу деректерін де тұрақты түрде тіркейді: қауіпті қайта қатарға тұру, күрт маневр жасау және ережелерді демонстративті түрде елемеу.
Сарғұловтың мәлімдеуінше, мас күйінде көлік жүргізетіндер, сондай-ақ жүргізуші куәлігінсіз әдейі рөлге отыратындар немесе жалған нөмірлік белгілерді қолданатындар ерекше алаңдаушылық тудырады. Оның айтуынша, дәл осындай құқықбұзушылықтар жол қозғалысына қатысушылардың барлығы үшін тікелей қауіп төндіреді.
Еске салайық, 21 наурызда Алматыда резонанс тудырған жол-көлік оқиғасы болды. Әл-Фараби және Мендікұлова көшелерінің қиылысында Mercedes пен Zeekr көліктері соқтығысқан. Апат салдарынан үш адам қаза тапты: 29 жастағы Mercedes жүргізушісі және осы көліктегі 20 және 22 жастағы екі жолаушы қыз оқиға орнында көз жұмды. Zeekr жүргізушісі тірі қалып, жарақатпен ауруханаға жеткізілді. Жол-көлік оқиғасы кезінде ол мас болған.
Кейін қалаға Астана, Ақмола, Қарағанды және Жамбыл облыстарынан экипаждар тартылды.
Сондай-ақ ОПМ аясында түнгі сүзгілік іс-шаралар күшейтілгені, оның ішінде Әл-Фараби даңғылында да жүргізіліп жатқаны атап өтілді.
