Атырауда 18 жастағы жүргізуші құжатсыз қашпақ болып, анасы полицияға кедергі келтірген
Атырауда 18 жастағы жүргізуші жүргізуші куәлігінсіз полициядан қашпақ болған. Оған «құйрықтан» құтылуға анасы көмектескен.
Полицияның мәліметінше, оқиға 28 наурызда болған. Lada Priora көлігінің жүргізушісі тоқтау туралы талапты елемеген. Ол үйіне қарай бет алып, қақпасы алдын ала ашық тұрған аулаға кірген. Көлік аулаға кіргеннен кейін жүргізушінің анасы патрульдік көліктің алдынан қақпаны күрт жауып, полицейлердің әрекетіне кедергі келтірген.
Жүргізуші екі бап бойынша жауапқа тартылды:
- жүргізуші куәлігінсіз көлік жүргізу;
- полицияның заңды қызметіне кедергі келтіру.
Сот шешімімен оған 10 тәулікке әкімшілік қамау тағайындалды.
Сондай-ақ 57 жастағы анасы да полиция қызметкерлерінің әрекетіне кедергі келтіргені үшін әкімшілік жауапкершілікке тартылды.
Бұдан бөлек, Lada Priora көлігінің иесі де жазаланды: ол көлікті жүргізуші куәлігі жоқ адамға басқаруға берген. Полиция оның 18 жастағы құқық бұзушының ағасы екенін хабарлады.
Полиция департаменті құқық бұзушы оқитын оқу орнына профилактикалық шаралар қабылдау үшін ресми ұсыныс жолданғанын да мәлімдеді.
Бұған дейін Қарағандыда 36 жастағы мас жүргізуші ұсталғаны, оның да жүргізуші куәлігі болмағаны айтылған.
Сондай-ақ Алматы тұрғыны әлеуметтік желілерде өзі жасамаған құқық бұзушылық үшін айыппұл келгенін хабарлаған.
