Ұлытау облысы Жәйрем кентінде 42 жастағы төрт баланың анасы қаза тапты: күдікті ретінде 33 жастағы бірге тұратын ер адам аталды
Ұлытау облысының Жәйрем кентінде қатыгездікпен жасалған кісі өлтіру оқиғасы тіркелді: 42 жастағы төрт баланың анасы Айгерім қаза тапты. Қылмысқа күдікті ретінде оның 33 жастағы бірге тұратын ер адамы аталып отыр.
Марқұмның әпкесі Дана Айгерімнің өмірі мен трагедияға дейінгі жағдай туралы айтып берді. Оның сөзінше, Айгерім өзін де, балаларын да толық қамтамасыз еткен: дүкенді сатып алып, жұмыс істеген, бірнеше пәтер алып, тұрғын үйді тәуліктік жалға беріп отырған.
«Ол ара сияқты тыным таппайтын. Бәрін өзі. Бәрі соның мойнында болды. Төрт баласын асырады, үнемі қалай табыс табуға болатынын іздейтін», — деді Дана.
Айгерімнің артында төрт бала қалды. Үлкен ұлы — студент, екіншісі мектепте оқиды, үздік оқушы, шахматпен айналысады. Екі кенжесі — ұл мен қыз. Қызы 5 жаста, мүгедектігі бар: ерте жаста инсульт алған.
«Ол қызын тура аяғынан тұрғызды. Дәрігерлер оны басқа аналарға үлгі ететін», — деді әпкесі.
Дананың айтуынша, Айгерім мінезі жұмсақ, өте мейірімді адам болған.
«Ол бәріне көмектесетін. Адамдарды аяйтын, жануарларды асырап алатын. Мен оған: сен тым мейірімдісің дейтінмін», — деп еске алды Дана.
«Зорлық-зомбылық тұрақты болды»
Айгерім бірге тұратын ер адамымен ресми некеде болмаған. Әпкесінің айтуынша, бастапқыда ол қамқорлық танытқанымен, уақыт өте келе қызғаныш, агрессия және күш қолдану басталған.
«Алдымен ол бәрін жасап беретін, әдемі күтім көрсететін. Кейін басталды: қызғаныш, агрессия, қол көтеру. Оған әдемі киінуге рұқсат бермейтін, айналаның бәріне қызғанатын», — деді Дана.
Туыстарының сөзінше, ер адам жұмыс істемеген, алкогольді жиі қолданған, ал шығынның бәрі, соның ішінде емделу де Айгерімнің мойнына түскен.
«Оның жүрекке қатысты ауыр ауруы болған, жұмыс істемейтін және жиі ішетін. Ол оны асырады, емдетті, Астанадағы ең жақсы дәрігерлерге жіберді. Айгерім дүкенде аздап жұмыс істеуін, өзін алмастыруын сұрайтын. Бірақ онда да дұрыс істемейтін, дүкенде отырып ішіп алатын», — деді Дана.
Дананың айтуынша, отбасындағы зорлық-зомбылық оқиғалары жиі қайталанған.
«Ол оған, анама, үлкен ұлына қол көтеретін. Жанжал шығарып, заттарды сындыратын».
Соған қарамастан, Айгерім қарым-қатынасты жалғастырған.
«Ол үнемі: тағы бір рет көрейік дейтін. Оны аяйтын, балалар әкесіне қатты бауыр басқан», — деді Дана.
Әпкесінің айтуынша, Айгерім мен оның жақындары полицияға бірнеше рет жүгінген.
«Ол одан қорқатын. Оны алып кететін, 15 минуттан кейін ол қайтадан терезесінің астында жүретін. Оның бір немере ағасы болған, соған қоңырау шалатын. Сірә, сол оның мәселелерін шешетін», — деді Дана.
Оның сөзінше, Айгерім жағдайдың одан әрі ушығуынан қауіптенген.
Қайғылы күн
Дананың айтуынша, Айгерім ақыры айырылысуға бел буып, Абзалды өзі жалға беріп жүрген пәтерлердің біріне жіберген. Ер адамның барар жері болмағандықтан, Айгерім оны далада қалдырмау үшін аяған.
Қайғылы оқиға күндіз болған. Айгерім соңғы рет шамамен 13:55-те байланысқа шыққан. Сол сәтте ол өз дүкенінде болған. Туыстарының айтуынша, бірге тұратын ер адам дүкенге келіп, пышақпен шабуыл жасаған.
«Сірә, ол мас болған. Дүкендегі сөре қанға боялған. Ол оған 20 рет пышақ сұққан. Үшеуі — өмірлік маңызды ағзаларға, қалғаны — арқасына», — деді Дана.
Осыдан кейін ер адам өзіне зиян келтіруге әрекеттенген, бірақ тірі қалған.
«Іс Қылмыстық кодекстің 99-бабы 5-тармағы бойынша — “аса қатыгездікпен жасалған кісі өлтіру” деп тіркелді. Біз бұдан артық ештеңе білмейміз, оны Жезқазған ауруханасына ауыстырды. Денсаулығында қандай да бір асқынулар басталған. Мен оның жазадан құтылып кетпеуін қалаймын», — деді Дана.
Полицияның түсініктемесі
Ұлытау облысы полиция департаменті кісі өлтіру фактісі бойынша сотқа дейінгі тергеу жүргізіліп жатқанын хабарлады. Онда күдікті — марқұмның 33 жастағы бірге тұратын ер адамы — қылмыстан кейін өзіне жарақат салуға әрекеттеніп, ауруханаға жеткізілгені расталды.
Полицияның мәліметінше, қазір ол медициналық мекемеде полицияның тәулік бойғы күзетінде. Оған қатысты қамауда ұстау түріндегі бұлтартпау шарасы санкцияланған. Емдеу аяқталғаннан кейін оны тергеу изоляторына ауыстыру жоспарланып отыр.
Тергеу барысы департамент басшылығының ерекше бақылауында екені айтылды.
«Балалар не болғанын толық түсінбейді»
Туыстарының айтуынша, балалар болған оқиғаны ауыр қабылдап жатыр. Үлкен ұлы соңына дейін өзін ұстап жүргенімен, кейін эмоциясын тежей алмаған. Кішілері әзірге не болғанын толық түсінбейді.
«Қызы жылап, анасы неге келмейді және неге қоңырау шалмайды деп сұрады», — деді Дана.
Жақындары бұл трагедияның алдын алуға болар еді деп есептейді.
«Ол бәрін аяйтын. Тіпті оны да. Үнемі отбасын сақтап қалуға тырысатын», — деді әпкесі.
Енді туыстары әділ тергеу жүргізілуін және балаларға қамқоршылық рәсімдеуді көздеп отыр.
