Зеленский Украинаның 1994 жылы ядролық арсеналдан бас тартуын «үлкен қателік» деп атады
Украина президенті Владимир Зеленский 1994 жылғы желтоқсанда Украинаның ядролық арсеналдан бас тартуын «үлкен қателік» деп атады. Ол бұл шешім АҚШ, Ұлыбритания, Франция, Қытай және Ресей тарапынан Будапешт меморандумында қарастырылған қауіпсіздік кепілдіктеріне айырбас ретінде қабылданғанын айтты.
Мемлекет басшысы бұл туралы британдық журналистер Аластер Кэмпбелл мен Рори Стюарт жүргізетін The Rest Is Politics подкастының бейсенбі, 9 сәуірде жарияланған шығарылымында мәлімдеді. Интервьюден мәтіндік үзінділерді Зеленский 10 сәуірде өзінің Telegram-арнасында бөлісті.
Подкастта Зеленский Украинаның ядролық қарудан бас тартуына байланысты «баға» әділ болуы тиіс екенін атап өтті.
«Украина ядролық қарудан бас тартуға келіскен кезде, басқа тарап төлейтін баға әділ болуы керек еді. Менің ойымша, НАТО-ға мүшелік — Украина басшылары ядролық арсеналға айырбас ретінде алуы тиіс нәрсенің ең азы. Біз не алдық? Ештеңе. Бұл әділетсіз ойын және үлкен қателік болды», — деді Зеленский.
Оның айтуынша, Будапешт меморандумына қол қойған өзге елдер Украинадан ядролық қарудан бас тартуды сұрағандықтан, «қауіпсіздік қолшатырымен» қамтамасыз етуі керек болған.
«Ақырында, мұның бәрі алдау болды. Біздің ядролық қаруымыздың едәуір бөлігі Ресейге берілді. Мысалы, стратегиялық ұшақтар — Ресей қазір осы соғыста бізге қарсы қолданып отырған ұшақтар», — деді президент.
Зеленский бұған дейін де Украинаның ядролық қарудан бас тартуын сынаған. 2025 жылғы қаңтарда ол италиялық Il Foglio газетіне берген сұхбатында бұрынғы биліктің ядролық арсеналдан бас тартуын «ақымақтық және жауапсыздық» деп атаған.
Сол жылдың ақпанында британдық журналист Пиерс Морганға берген сұхбатында Зеленский Украинаның қауіпсіздігіне жеткілікті кепілдік ретінде батыстық серіктестердің ядролық қару беруі мүмкін екенін айтқан. Оның пікірінше, бұл Украина НАТО-ға қабылданбаса да, Ресейді жаңа шабуылдан тежеуге мүмкіндік берер еді.
