Жапон ғалымдары кофей қышқылының колоректалды қатерлі ісік жасушаларының өсуін тежеу механизмін сипаттады
Жапон ғалымдары кофей қышқылының — кофе полифенолдарынан ағзада түзілетін қосылыстың — колоректалды қатерлі ісік жасушаларының өсуін басуындағы молекулалық механизмді ашты. Зерттеу Scientific Reports журналында жарияланған.
Бұған дейін эпидемиологиялық деректер кофе тұтыну мен ішек қатерлі ісігінің даму қаупінің төмендеуі арасында байланыс барын көрсеткенімен, нақты механизмдер түсініксіз болып келген. Киото префектуралық медицина университетінен Мотоки Ватанабэ жетекшілік еткен зерттеушілер сусынның жекелеген компоненттері қандай рөл атқаратынын анықтауға кіріскен.
Кофе құрамындағы полифенолдар, соның ішінде хлороген қышқылы, ішекте ыдырап, кофей қышқылына айналатыны белгілі. Ғалымдар ісік жасушаларына әсерін дәл осы кофей қышқылының молекулалық деңгейдегі ықпалы арқылы зерттеген.
Тәжірибелер кофей қышқылын қосу қатерлі ісік жасушалары колонияларының түзілуін едәуір тежейтінін көрсетті. Сонымен қатар бұл зат бұрын колоректалды қатерлі ісігі бар науқастарда қолайсыз болжаммен байланыстырылған RPS5 ақуызымен байланысатыны анықталған.
Қосымша тәжірибелер RPS5 белсенділігін басу ісік жасушаларының жасушалық циклін ДНҚ-ны көшіруге дайындық кезеңінде тоқтататынын көрсетті. Бұл ретте кофей қышқылы да, RPS5 экспрессиясының төмендеуі де жасуша бөлінуінің негізгі реттеушісі саналатын cyclin D1 ақуызы деңгейінің төмендеуіне әкелген.
Авторлардың мәліметінше, RPS5 ақпараттық РНҚ мөлшерін, демек cyclin D1 синтезін посттранскрипциялық реттеу арқылы бақылап отырады. RPS5 ақуызына байланыса отырып, кофей қышқылы оның жұмысын бөгеп, осылайша ісіктің өсуін тежейді.
Ватанабэ бұл нәтижелер кофей қышқылы құрылымына негізделген туындыларды жасауға және RPS5-ке бағытталған қатерлі ісіктің алдын алу мен емдеудің жаңа стратегияларын әзірлеуге көмектеседі деген үміт білдірді.
Сонымен бірге ғалымдар бұл — жасушаларға жүргізілген базалық зертханалық тәжірибелер екенін атап өтті. Алынған деректер кофені тұтыну ішек қатерлі ісігінен тікелей қорғайтынын дәлелдемейді. Бұдан бөлек, сусын құрамында кофеин және басқа да заттар бар, әрі ол бәріне бірдей жарай бермейді.
