Исламабадта АҚШ пен Иран делегациялары тікелей келіссөз бастады
Пәкістанның астанасы Исламабадта АҚШ пен Иран делегацияларының тікелей келіссөздері басталды.
Кездесу тарихи сипатқа ие: бұл — 1979 жылдан бері АҚШ пен Иранның ресми тұлғалары арасындағы ең жоғары деңгейдегі өзара әрекет. Алайда келіссөздердің сәтті аяқталу ықтималдығы төмен деп бағаланып отыр. Екі тарап та сәтсіздік тәуекелі соғыстың қайта жаңғыруына әкелуі мүмкін екенін түсінгенімен, олардың бейбітшілікке қатысты көзқарастары әртүрлі екені айтылды.
АҚШ делегациясын келіссөздерде вице-президент Джей Ди Вэнс бастап отыр. Делегация құрамында сондай-ақ Ақ үйдің арнайы өкілі Стив Уиткофф және Трамптың күйеу баласы Джаред Кушнер бар.
Ақ үй өкілі: «Исламабадта тиісті салалар бойынша америкалық сарапшылардың толық құрамы бар. Қосымша сарапшылар Вашингтоннан қолдау көрсетіп отыр», — деп мәлімдеді.
Иран делегациясын парламент спикері Мохаммед Багер Галибаф басқарады. Құрамында сыртқы істер министрі Аббас Арагчи да бар.
Келіссөздерге Пәкістан премьер-министрі Шехбаз Шариф пен сыртқы істер министрі Ишак Дар да қатысып отыр.
Тегеранда АҚШ-қа «сенім жоқ» екені айтылып, Ливан бойынша атысты тоқтату мәселесі негізгі тақырыптардың бірі ретінде аталды.
Сенбі күні тікелей келіссөздер басталар алдында әр делегация Шарифпен бөлек кездесулер өткізіп, хабарламалар алмасты.
Ирандық БАҚ-тың мәліметінше, олардың делегациясы жанама келіссөздер ілгерілеп, Иран Израильден Бейрут пен Оңтүстік Ливанға соққыларын тежеуге қатысты кепілдік алғаннан кейін тікелей келіссөзге келіскен. Алайда мұндай уәденің Израиль тарапынан берілген-берілмегені белгісіз.
Иран баспасөзі АҚШ Иранның бұғатталған қаражатын бұғаттан шығаруға келіскенін де мәлімдеген, бірақ америкалық шенеунік бұл ақпаратты жоққа шығарды.
Бұған дейін АҚШ президенті Дональд Трамп Иранның «козырі жоқ», тек Ормуз бұғазы арқылы бүкіл әлемді қысқа мерзімді бопсалау мүмкіндігі ғана бар екенін айтқан.
