Тоқаев альпинист Ерванд Ильинскийге «Қазақстанның Еңбек Ері» атағын берді
Қазақстан Президенті Қасым-Жомарт Тоқаев альпинист Ерванд Ильинскийге «Қазақстанның Еңбек Ері» атағын берді.
Мемлекет басшысының баспасөз қызметінің хабарлауынша, марапат «альпинизмдегі ерекше жетістіктері, сондай-ақ елдегі спортты дамытуға қосқан зор үлесі және қоғамдық қызметке белсенді қатысқаны үшін» берілген.
Ерванд Тихонович Ильинский 1940 жылғы 25 тамызда Красноярскіде дүниеге келген. 1949 жылы ата-анасымен бірге Алматыға көшіп келген. Ол — кеңестік және қазақстандық альпинист әрі жаттықтырушы.
Ильинский Қазақстан құрамасының альпинизм бойынша бас жаттықтырушысы болған. Бұл құрама 1991–2010 жылдары әлемде алғаш болып планетаның барлық 14 сегізмыңдық шыңын бағындырған команда ретінде аталады. Ол Эверестті 1990 жылы бағындырған және 2007 жылы Қазақстанда алғаш болып «Жеті шың» клубының мүшесі атанған.
Ильинский КСРО чемпионаттарының бірнеше дүркін чемпионы және жүлдегері болған. 1973 жылдан бастап альпинизм бойынша СКА САВО-ның аға жаттықтырушысы қызметін атқарған.
Оған мынадай атақтар берілген:
- ҚазКСР-дің еңбек сіңірген жаттықтырушысы (1975)
- КСРО-ның еңбек сіңірген жаттықтырушысы (1979)
- КСРО-ның еңбек сіңірген спорт шебері (1982)
1971 жылы ҚазПТИ-дегі альпинизм секциясына Ильинскийге үшінші разрядты спортшылар Қазбек Валиев пен Валерий Хрищатый келген. Кейін ТуркВО командасы КСРО чемпионатында жеңіске жеткеннен соң, оны ЦСКА-ға жаттықтырушы ретінде шақырған. Содан бері ол КСРО-ның 100-ден астам спорт шеберін, 36 халықаралық дәрежедегі спорт шеберін және 24 еңбек сіңірген спорт шеберін дайындаған.
1993 жылы ол жас Денис Урубкодан әлемдік альпинизмнің болашақ жұлдызын байқап, оны өз клубына шақырған.
2000 жылы жас альпинистер Максут Жұмаев пен Василий Пивцовты жаттықтыра бастаған. Осы қазақстандық жаңа буын тау бағындырушыларынан ол команда құрып, 2010 жылы «Қазақстан құрамасы планетаның барлық 14 сегізмыңдығында» атты ауқымды бағдарламаны жүзеге асырған.
