Қазақстан құрамасы Армениямен жолдастық матч өткізеді
Қазақстанның футболдан ұлттық құрамасы Армения құрамасымен жолдастық матч өткізеді.
Ойын 6 маусымда Ереванда, Вазген Саркисян атындағы Республикалық стадионда өтеді. Бұл екі құраманың өзара тоғызыншы кездесуі болмақ. Соңғы рет Қазақстан мен Армения құрамалары 2024 жылғы маусымда кездескен.
Қазақстан футбол федерациясы Армения футбол федерациясымен 2026 жылғы маусымда ұлттық құрамалар арасында жолдастық матч өткізу туралы келісімге қол жеткізілгенін хабарлады.
Маусым айында Қазақстан құрамасы тағы бір жолдастық матч өткізеді: 9 маусымда «Түркістан Аренада» Талғат Байсуфинов баптайтын команда Венгрия құрамасымен ойнайды.
Ұлттық құраманың алдағы ең жақын матчтарына келсек, жаңа жолдастық FIFA турнирі — FIFA Series 26 аясында Қазақстан құрамасы Астанада екі ойын өткізеді: 25 наурызда — Намибиямен, 31 наурызда — Комор аралдарымен.
Бұған дейін Қазақстанның 16 жасқа дейінгі жасөспірімдер құрамасы Қырғызстанда өткен International Talents Cup турнирінде Өзбекстандағы құрдастарын жеңген еді.
