Рахат Турлыхановтың әкімшілік сот қаулысын даулауы нәтиже бермеді: материалдар қылмыстық белгілерге тексерілуге жіберілді
Бұрынғы әнші Рахат Турлыханов отбасылық жанжалдан кейін туындаған іс бойынша әкімшілік соттың материалдарды қылмыстық құқықбұзушылық белгілерінің бар-жоғын тексеруге жіберу туралы қаулысын даулауға әрекеттенді. Алайда апелляциялық саты сот шешімін күшінде қалдырып, шағым қанағаттандырылмады.
Алматы прокуратурасы бастапқы кезеңде материал әкімшілік іс жүргізу тәртібімен қаралғанын түсіндірді.
«Әкімшілік соттың қарау нәтижесі бойынша іс жүргізу тоқтатылды. Сот қаулысына шағым берілді, алайда апелляциялық инстанция оны өзгеріссіз қалдырды, шағым — қанағаттандырусыз», — деп жауап берді ведомство.
Прокуратураның мәліметінше, қазіргі уақытта материалдар Алматы қаласы Медеу ауданы полиция басқармасына қылмыстық іс жүргізу тәртібімен процессуалдық шешім қабылдау үшін жолданған.
«Қылмыстық іс қозғау мәселесі қазіргі уақытта шешілу сатысында», — деді Алматы прокуратурасы.
Еске салайық, 15 наурызда БАҚ-та қазақстандық әнші Рахат Турлыхановтың ұсталғаны туралы ақпарат шыққан. Алматы қалалық полиция департаменті редакция сұрауына жауап ретінде әншінің жұбайын ұрды деген күдікпен полицияға жеткізілгенін хабарлаған. Ведомство тексеріс барысында әйел адам бастапқыда өзіне физикалық күш қолданылғанын айтқанымен, кейіннен ұрып-соғу фактісін жоққа шығарып, отбасылық жанжал бойынша арызданғанын атап өтті.
Істі қарау қорытындысы бойынша Рахат Турлыхановқа қатысты ӘҚБтК-нің 73-бабы 1-бөлігі («Отбасылық-тұрмыстық қатынастар саласындағы құқыққа қарсы әрекеттер») бойынша әкімшілік хаттама толтырылған.
16 наурызда сот Рахат Турлыхановтың ісін қарап, іс жүргізуді тоқтатып, жұбайының бастапқы өтінішін ескере отырып, қылмыстық құқықбұзушылық белгілерінің бар-жоғын тексеру үшін материалдарды прокуратура мен полиция департаментіне жолдауды қаулы еткен.
Сондай-ақ 2024 жылғы қаңтарда Рахат Турлыханов жұбайына соққы жасағаны үшін сотқа тартылғаны айтылды. Ол кінәсін мойындаған, ал жұбайы татуласқанын мәлімдеген. Алайда құқықбұзушылықтың қайталануын ескере отырып, сот оған 10 тәулік әкімшілік қамау тағайындаған. Кейін жұп видеоүндеу жазып, онда жұбайы отбасында бәрі жақсы екенін айтқан. БАҚ бұл бір жыл ішіндегі осындай екінші құқықбұзушылық болғанын да атап өткен.
