Қостанай облысында құтқарушылар су тасқынына қарсы шаралар жүргізіп жатыр
Дүйсенбі, 30 наурызда өңірлік ТЖД баспасөз қызметі Қостанай облысының бірнеше ауданында және облыс орталығында құтқарушылардың су тасқынына қарсы іс-шаралар жүргізіп жатқанын хабарлады.
Ведомство дерегінше, Денисов ауданында, Набережное ауылынан 4 шақырым жерде, қардың қарқынды еруіне байланысты Аршалы мен Набережное ауылдарының арасындағы жергілікті маңызы бар автожол арқылы су асып өткені тіркелген.
Хабарламада: «Елді мекендерге қауіп жоқ, көлік қатынасы бұзылған жоқ. Балама жол бар — Набережное ауылына апаратын топырақ жол. ТЖД күштері мен құралдарының, сондай-ақ жергілікті атқарушы органдардың күшімен тәулік бойы кезекшілік ұйымдастырылды», — делінген.
Сондай-ақ Қостанай ауданының Мичуринское кентінде «Мелиоратор» бау-бақша қоғамы жағынан су Астана және Восточный шағынаудандары бағытына қарай бағытталып жатқаны нақтыланды.
Департамент мәліметінше, тұрғын үйлер мен аула аумақтарын су басу қаупі жоқ. Оқиға орнында ТЖД, жергілікті атқарушы органдардың күштері мен құралдары, сондай-ақ полиция қызметкерлері жұмылдырылған. Восточный шағынауданында еріген суды сорып шығару жұмыстары жүргізіліп жатыр.
Ведомство ақпаратында Қостанай қаласының Қунай шағынауданында да қауіп жоқ екені айтылды. Жағдайды бақылау үшін құтқарушылар дрон көмегімен әуеден шолу жасаған.
Жалпы жағдай тұрақты, барлық қызмет штаттық режимде жұмыс істеп жатыр, деп қосты ТЖД.
Бұған дейін, кешкі уақытта Мичуринское кентінің Восточный шағынауданының тұрғындары мессенджерлер мен әлеуметтік желілерде көшелердің күрт су басқаны туралы хабарлаған. Олардың айтуынша, егістік алқаптардан келген су шамамен 30 минут ішінде жолдар мен шағынаудан аулаларын баса бастаған. Аудан әкімі Олжас Нұрғалиев жағдайға қатысты пікір білдіргені де атап өтілді.
