Қазақстанда автокөлікті қайта жабдықтауға рұқсат алу ережелерін жеңілдету ұсынылды
Қазақстанда автокөлікті қайта жабдықтауға рұқсат алу ережелерін жеңілдету мәселесі қарастырылып жатыр. Күтілетін өзгерістердің бірі — құжаттардың бір бөлігін цифрлық форматқа көшіру.
ІІМ не ұсынады: түзетулердің мәні
«Ашық НҚА» порталында автокөліктер мен тіркемелерді қайта жабдықтауға куәлік беру тәртібін реттейтін ІІМ бұйрығына енгізілетін түзетулер жобасы жарияланды.
Өзгерістердің негізгі мақсаты — процесті неғұрлым автоматтандырылған форматқа көшіру. Жобаға сәйкес, жүргізушілер кейбір құжаттарды қағаз түрінде ұсынбайды, өйткені оларға қолжетімділік мемлекеттік ақпараттық жүйелер арқылы автоматты түрде қамтамасыз етіледі.
Сондай-ақ жоба қолданыстағы ережелерді жаңартылған заңнамаға сәйкестендіруге бағытталған. Өзгерістер енгізілгеннен кейін рәсімдеу процесі жүргізушілер үшін жылдамырақ әрі ыңғайлы болады деп күтіледі.
2026 жылы автокөлікті қайта жабдықтау үшін қандай құжаттар қажет
Өтініш беруші конструкциясына өзгерістер енгізілген автокөлікті мамандандырылған халыққа қызмет көрсету орталығына алып келіп, өтініш беруі тиіс.
Өтінішке алдын ала техникалық сараптамаға қажет құжаттар қоса тіркеледі, ал қажет болған жағдайда — қосымша құжаттар ұсынылады:
- көлік құралының конструкциясына өзгерістер енгізу мүмкіндігі мен тәртібі туралы қорытынды (әкімшілік полицияның аумақтық бөлімшелері береді);
- көлік құралының конструкциясына өзгерістер енгізу кезінде пайдаланылған компоненттерге сәйкестік сертификаттарының көшірмелері (болған жағдайда);
- көлік құралының конструкциясына өзгерістер енгізу бойынша жұмыстардың көлемі мен сапасы туралы өтініш-декларация (техникалық қызмет көрсету станциясы береді);
- конструкция қауіпсіздігін тексеру хаттамасы (аккредиттелген сынақ зертханасы береді);
- конструкциясына өзгерістер енгізілген көлік құралының техникалық жай-күйін тексеру нәтижелері бойынша рәсімделетін диагностикалық карта (техникалық байқау орталығы береді).
Фаркоп, лифт, «люстралар»: нені ресми түрде қайта жабдықтау деп санайды
Ресми түрде қайта жабдықтауға жататын өзгерістер ретінде мыналар көрсетілген:
- егер өндіруші нақты модель үшін қарастырмаған болса, шатырға қосымша жүксалғыш орнату. Бұл жағдайда жүргізуші техпаспортқа өзгеріс енгізуге міндетті;
- қосымша элементтерді орнату: тіркеме тартуға арналған металл ілмек (фаркоп) — зауыттық орнатусыз немесе тиісті сертификатсыз, сондай-ақ алдыңғы бөлікті қорғауға арналған металл доға;
- аспаны (подвеска) өзгерту (лифт), оның ішінде биіктігін өзгерту немесе жүріс бөлігіне өзге араласулар;
- өндіруші қарастырмаған немесе фар деңгейінен жоғары орнатылған күндізгі жүріс шамдарын («люстралар») орнату (егер қосымша жүріс шамдары фар деңгейінен төмен орнатылса — техпаспортқа өзгеріс енгізу қажет емес).
Мұндай кез келген өзгерістер жол қауіпсіздігін қамтамасыз ету үшін ресми түрде тіркелуі тиіс.
Бұған дейін Қазақстанда қайта жабдықтауға куәлікті онлайн форматта алу мүмкіндігі қарастырылғаны да еске салынды.
Сондай-ақ: «Бензиннің орнына газ — 2026 жылы ГБО қаншалықты өзекті әрі тиімді?»
Қытай көліктері Қазақстан жолдарын жаулап алды! Ал сен оларды ажырата аласың ба? Біз көмектесеміз! Біздің арнайы жобамызға кір: қытай автокөліктері әлемі — маркалар, брендтер және өндірушілер туралы бәрі!
