Президент Қасым-Жомарт Тоқаев Мұхтар Шахановтың қайтыс болуына байланысты көңіл айтты
Президент Қасым-Жомарт Тоқаев көрнекті ақын әрі қоғам қайраткері, халық жазушысы, Қазақстанның Еңбек Ері Мұхтар Шахановтың қайтыс болуына байланысты оның туған-туыстары мен жақындарына көңіл айту жеделхатын жолдады.
Жеделхатта Мұхтар Шахановтың сөз өнеріне ғұмырын арнаған бірегей тұлға болғаны атап өтілген. Мемлекет басшысы оның ұлттық поэзияны жаңа биіктерге көтеріп, отандық әдебиет пен мәдениеттің көкжиегін кеңейткенін, сондай-ақ ана тілінің тағдырына шынайы алаңдап, осы бағыттағы көптеген маңызды бастамалардың басында тұрғанын жеткізген.
Сонымен қатар жеделхатта ақын шығармаларының әлемнің көптеген тіліне аударылғаны, ал шабытты лирикасының кең оқырман қауымының шынайы сүйіспеншілігіне бөленгені айтылған. Президент Мұхтар Шахановтың жарқын бейнесі мен бай әдеби мұрасы халық жадында мәңгі сақталатынын білдірген.
Мұхтар Шаханов 84 жасқа қараған шағында қайтыс болды. Бұл туралы алдыңғы күні белгілі болған. Қазақстанның Мәдениет және ақпарат министрлігі оның қазасына байланысты ведомствоның әлеуметтік желідегі ресми парақшаларында көңіл айтты.
Мұхтар Шаханов — кеңестік және қазақстандық ақын әрі жазушы, саяси қайраткер, Парламент Мәжілісінің бұрынғы депутаты. Ол Қазақстанның Еңбек Ері, республиканың халық жазушысы, сондай-ақ Қырғызстанның халық ақыны атанған.
Ол 1942 жылғы 2 шілдеде дүниеге келген. 1969 жылы Шымкент педагогикалық институтын «қазақ тілі мен әдебиеті пәнінің мұғалімі» мамандығы бойынша тәмамдаған.
Әр жылдары облыстық және республикалық газеттерде тілші, Қазақ радиосында және «Жалын» журналында редактор болып қызмет атқарған. Көптеген поэзиялық кітаптардың авторы, шығармалары әлемнің көптеген тіліне аударылған. Қазақстанның Қырғызстандағы елшісі болып жұмыс істеген. Әртүрлі марапаттармен наградталған.
