ОПЕК+ мамыр айына мұнай өндіру квотасын 206 мың баррельге арттыруға келісті, бірақ Ормуз бұғазының жабылуы жоспарды шектеп отыр
5 сәуір, жексенбі күні ОПЕК+ құрамындағы сегіз ел мамыр айына мұнай өндіру квоталарын тәулігіне 206 000 баррельге арттыру туралы келісімге келді. Дегенмен бұл өсімнің басым бөлігі қағаз жүзінде қалуы мүмкін, өйткені ОПЕК-тің негізгі мүшелері Ормуз бұғазының жабылуына байланысты өндірісті ұлғайта алмай отыр.
Квотаның тәулігіне 206 000 баррельге өсуі Ормуз бұғазының жабылуынан бұзылған жеткізілім көлемінің 2 пайызынан да аз. ОПЕК+ ішіндегі дереккөздердің айтуынша, бұл шешім су жолы ашылғаннан кейін өндірісті арттыруға дайындық барын көрсетеді.
Сарапшылар кеме қатынасына қатысты іркілістер сақталып тұрған кезде бұл өсімді «теориялық» деп бағалайды.
«Ормуз бұғазы жабық болғанда, ОПЕК+ елдерінен қосымша мұнай жеткізілімдері іс жүзінде өзектілігін жоғалтады», — дейді мамандар.
Парсы шығанағы елдеріне әсер еткен іркілістерден бөлек, Ресей сияқты басқа елдер де өндіріс көлемін арттыра алмай отыр. Мәскеу жағдайында бұл батыс санкцияларымен және Украинамен соғыс кезінде инфрақұрылымға келген залалмен байланысты.
Парсы шығанағы елдерінде инфрақұрылым зымыран шабуылдары мен ұшқышсыз аппараттар соққыларынан қатты зардап шеккен. Парсы шығанағы елдерінің бірнеше ресми өкілі соғыс тоқтап, Ормуз бұғазы бірден ашылған күннің өзінде қалыпты жұмысқа оралу және өндірістік мақсаттарға жету үшін айлар қажет болатынын мәлімдеді.
Жексенбі күні отырыс өткізген ОПЕК+ ішіндегі бөлек топ — Біріккен министрлік мониторинг комитеті — энергетикалық нысандарға жасалған шабуылдарға алаңдаушылық білдірді. ОПЕК+ мәлімдемесінде мұндай нысандарды жөндеу қымбатқа түсетіні және көп уақыт алатыны, соның салдарынан жеткізілімге әсер ететіні айтылған.
АҚШ пен Израильдің Иранмен соғысы басталғаннан кейін мұнай бағасы төрт жылдағы ең жоғары деңгейге көтеріліп, барреліне 120 долларға жақындады. Бұл көлік отыны бағасының күрт өсуіне әкеліп, әлем бойынша тұтынушылар мен бизнеске салмақ түсірді және үкіметтерді отынды үнемдеу шараларын қабылдауға итермеледі.
Бұған дейін Иран билігі ОПЕК-тегі мұнай өндіру көлемі бойынша екінші орында тұрған Иракты Ормуз бұғазы арқылы кеме қатынасына қатысты шектеулерден босатқан. Бұл туралы ирандық әскери өкілдің араб тіліндегі видеоүндеуі Иранның мемлекеттік ақпарат агенттігінде жарияланды.
Бес аптаға созылған соғыс басталғаннан кейін Тегеран Ормуз бұғазы арқылы жүк тасымалын тоқтататынын жариялаған. Қазір бұл теңіз жолымен тек Иранға достас елдерге ғана өтуге рұқсат етіледі. Tasnim агенттігінің дерегінше, олардың қатарында Ресей, Қытай, Үндістан және Пәкістан бар.
