Трамптың Иранға соққыларды жалғастыру уәдесінен кейін мұнай бағасы күрт өсті
Трейдерлер АҚШ президенті Дональд Трамптың Иранға соққыларды жалғастыруға уәде беруінен кейін мұнай жеткізілімінде ұзаққа созылатын үзілістер болуы мүмкін деп алаңдай бастады. Осы жағдай аясында бейсенбі күні АҚШ-та мұнай бағасы 11 пайыздан астам көтерілді, ал Brent маркалы мұнайдың бағасы шамамен 8 пайызға өсті.
Трамп әскери операциялардың күшейтілетінін мәлімдегенімен, ұрыс қимылдарын тоқтату туралы айтқан жоқ. Сондай-ақ ол Ормуз бұғазының жұмысын қайта жандандыруға алып келуі мүмкін қадамдар жөнінде ешқандай нақты мәлімет бермеді.
Аналитиктердің айтуынша, осының бәрі «қара алтын» бағасының жаңа өсім толқынына себеп болды.
Еске салайық, сәрсенбі күні ұлтқа жолдауында Трамп алдағы екі-үш апта ішінде «біз оларға аса күшті соққы жасаймыз» деген. Ол Иранды «тас дәуіріне, өз орындарына» қайтаратынын да уәде еткен.
«Нарық Ормуз бұғазы екі аптадан кейін ашылса, тәуекел үшін төленетін үстеме баға бірден төмендейді деп күтеді», — деді басылымның сұхбаттастарының бірі.
Тағы бір сұхбаттас соғыстың тез реттелуі экономикалық әсердің салыстырмалы түрде қалыпты болуын білдіруі мүмкін екенін айтып, дағдарыс салдарынан экономикалық перспективалар әлі де белгісіз күйде қалып отырғанын қосты.
Энергия тасымалдаушылары бағасының күрт өсуі жағдайында Ормуз бұғазы арқылы кеме қатынасын қайта бастау әлем үкіметтері үшін басым міндетке айналды. Бұған дейін Франция президенті америкалық президентті сынап, оған «байыпты болу керек» деген. Ол сондай-ақ Ормуз бұғазын күшпен ашу мүмкін емес екенін мәлімдеген.
Сондай-ақ БАҚ мәліметінше, ОПЕК+ елдері жексенбі күнгі кездесуде мұнай өндіруді одан әрі арттыру мәселесін қарастыруы ықтимал. Алайда аналитиктердің пікірінше, Ормуз бұғазы ашылмайынша, мұнай өндірісін ұлғайту жанармай тапшылығы жағдайын түзете қоюы екіталай.
