Ультраөңделген өнімдерді жиі тұтыну жүрек-қантамыр аурулары қаупін арттыруы мүмкін
Ультраөңделген өнімдерді жиі тұтыну ауыр жүрек-қантамыр ауруларының қаупін едәуір арттыруы мүмкін. Бұл тақырыптағы зерттеу JACC: Advances журналында жарияланған.
Зерттеуде чипсы, шұжық өнімдері, тәтті сусындар, дайын тағамдар және тез дайындалатын таңғы ас сияқты өнімдер қарастырылған. Нәтижеге сәйкес, күніне тоғыз порциядан көп ультраөңделген өнім тұтынған адамдарда оларды сирек жейтіндермен салыстырғанда инфаркт, инсульт жағдайлары немесе жүрек-қантамыр себептерінен өлім қаупі 67 пайызға жоғары болған.
Зерттеу 45 пен 84 жас аралығындағы, бастапқыда жүрек аурулары диагнозы қойылмаған 6800-ден астам адамды қамтыған. Ғалымдар қатысушылардың жағдайын бақылап, олардың тамақтану рационын сауалнамалар арқылы талдаған.
Талдау қауіптің біртіндеп өсетінін көрсеткен: күніне қосылған әрбір қосымша порция қолайсыз оқиғалардың ықтималдығын шамамен 5 пайызға арттырған. Бұл әсер рационның калориялылығы, тамақтану сапасы, сондай-ақ семіздік, диабет және гипертония сияқты факторлар ескерілгеннен кейін де сақталған. Бұл қауіп тек калориямен немесе құрамымен ғана емес, тағамның өңделу деңгейімен де байланысты болуы мүмкін екенін білдіреді.
Әсер ету механизмдері толық зерттелмегенімен, алдыңғы жұмыстар мұндай өнімдердің қабынуға, висцералды майдың жиналуына және зат алмасудың бұзылуына ықпал ететінін көрсетеді. Бұлар жүрек-қантамыр аурулары үшін негізгі қауіп факторлары ретінде аталады.
Авторлар зерттеу тамақтануды өзін-өзі бағалауға негізделгенін және белгілі бір шектеулері бар екенін атап өткен. Дегенмен нәтижелер бұрынғы деректермен үйлесіп, рациондағы ультраөңделген өнімдердің үлесін азайтуға қатысты уәждерді күшейтеді.
Ғалымдардың айтуынша, тәуекелді төмендетудің қарапайым жолдарының бірі — өнім құрамына мұқият қарап, азырақ өңделген тағамдарды таңдауға басымдық беру: көкөністер, бұршақ тұқымдастар, жаңғақтар және тұтас дәнді дақылдар.
