Қырғызстанда жүргізушілердің агрессивті мінез-құлқы үшін жауапкершілік енгізу ұсынылды
Қырғызстанда Құқық бұзушылықтар туралы кодекске өзгерістер енгізу жөніндегі заң жобасы қоғамдық талқылауға шығарылды. Құжат жолдардағы жүргізушілердің агрессивті мінез-құлқы үшін жауапкершілік енгізуді көздейді.
Заң жобасында жаңа 189-бапты енгізу ұсынылған. Ол жүргізушілер арасындағы қақтығыстар, төбелестер және өзге де агрессивті әрекеттер жағдайларын тікелей реттеуге бағытталған.
Жобаға сәйкес, жол қозғалысы қауіпсіздігіне қатер төндіретін және жүріс бөлігінде төбелеске немесе қақтығысқа қатысу үшін 10 мың сом (шамамен 57 мың теңге) көлемінде айыппұл қарастырылған.
Егер құқық бұзушылық бір жыл ішінде қайталанса, жаза қатаңдайды: жүргізушіні алты айға жүргізуші куәлігінен айыруы мүмкін.
Заң жобасын ұсынушылардың айтуынша, соңғы жылдары елде жолдағы жанжалдар жиілеп, олар тікелей жол үстінде физикалық қақтығысқа ұласатын жағдайлар көбейген. Бұл қауіп тек жанжалға қатысушыларға ғана емес, басқа жүргізушілер мен жаяу жүргіншілерге де төнеді.
Негіздеме-анықтамада келтірілген деректерге сай, жол-көлік оқиғаларының 90 пайыздан астамы жүргізушілердің кінәсінен болады, ал жалпы апаттылық деңгейі өңірдегі ең жоғары көрсеткіштердің бірі болып қала береді.
Заң жобасы жолдағы қақтығыстар санын азайтуға, жүргізушілер тәртібін күшейтуге және қауіпсіз жүргізу мәдениетін қалыптастыруға бағытталған.
Бұған дейін Қазақстанның өңірлерінде және Астанада «Азаматтарға арналған үкімет» мемлекеттік корпорациясының филиалдарында ұсталымдар жүргізілгені хабарланған. Мысалы, елордада арнайы ХҚКО басшысының бұрынғы орынбасары әшкереленген: ол жүйелі түрде пара үшін азаматтарға емтихан тапсыруға және жүргізуші куәлігін алуға көмектескен. Процестік тәртіппен 60-тан астам факт құжатталып, жалпы сома 100 миллион теңгеден асқаны көрсетілген.
Сондай-ақ: «Даулы мәселе» — Бақытжан Базарбек «құқығынан айырылғандарға» амнистия туралы
