Алматыдағы 2026 жылға арналған «әлеуметтік-экономикалық мәртебе шкаласы» қызу талқыланды: министрлік ресми түрде бекітілмегенін айтты
Әлеуметтік желілерде Алматыдағы 2026 жылға арналған «азаматтардың әлеуметтік-экономикалық мәртебе шкаласы» деп аталған кесте кеңінен талқыланып жатыр. Кестеде адамдар табыс деңгейіне қарай санаттарға бөлінген — аз қамтылғандардан бастап мультимиллионерлерге дейін.
«Азаматтардың әлеуметтік-экономикалық мәртебе шкаласы» атауымен кестенің скриншоты Threads әлеуметтік желісінде жарияланған. Пікірлерде қазақстандықтар өздерінің қай санатқа жататынын қызу талқылай бастады.
Кестедегі мәліметке сәйкес, табыс бірнеше деңгейге бөлінген. Мысалы:
- 250 мың теңгеге дейін табыс алатындар — аз қамтылғандар;
- 250 мыңнан 450 мың теңгеге дейін — кедейлер;
- 650 мыңнан 1 миллион теңгеге дейін — орта тап.
Сондай-ақ:
- 5 миллионнан 15 миллион теңгеге дейін табысы бар адамдар — «миллионерлер»;
- 15 миллионнан 100 миллион теңгеге дейін — «мультимиллионерлер» деп көрсетілген.
Жарияланым тез арада вирустық сипат алып, қолданушылар мұндай ресми жіктеу бар-жоғы туралы пікірталасқа түсті. Осыған байланысты Еңбек және халықты әлеуметтік қорғау министрлігі бұл шкаланың ресми түрде бекітілмегенін хабарлады.
Ведомство жауабында министрлік деңгейінде азаматтардың әлеуметтік-экономикалық мәртебесін (мысалы, «аз қамтылған», «кедей», «өтпелі тап» және т.б.) өңірлер бойынша, оның ішінде Алматы қаласы бойынша нақты табыс шектерімен айқындайтын шкала ресми түрде бекітілмегені айтылған.
Министрліктің түсіндіруінше, азаматтардың мұқтаждығын бағалау және әлеуметтік қолдаудың жекелеген түрлерін тағайындау үшін отбасының (адамның) әлеуметтік әл-ауқатын анықтау әдістемесі қолданылады. Бұл әдістеме отбасының жағдайын кешенді бағалауды көздейді: есептеу кезінде тек табыс қана емес, сонымен бірге қарыз жүктемесі, мүліктің болуы, балалар саны, денсаулық жағдайы және өзге де әлеуметтік-экономикалық факторлар ескеріледі.
Осылайша, ведомство атап өткендей, Қазақстанда азаматтарды тек табыс деңгейіне қарай қаржылық мәртебелерге бөлетін бірыңғай ресми кесте белгіленбеген.
Сонымен қатар Ұлттық статистика бюросы халықты табысына қарай тоқсан сайын 10 тең топқа бөледі: бірінші топ — табысы ең төмен адамдардың он пайызы, соңғы топ — табысы ең жоғары он пайызы.
