Қазақстанда 11 сәуірден бастап негізгі ҰБТ-ға өтініш қабылдау басталады
11 сәуірден бастап Қазақстанда Бірыңғай ұлттық тестілеуге (ҰБТ) қатысу үшін өтініш қабылдау басталады. Тіркеу 25 сәуірге дейін жалғасады.
Министрліктің мәліметінше, негізгі ҰБТ-ға тіркелу 11–25 сәуір аралығында жүргізіледі. Өтінішті Ұлттық тестілеу орталығының app.testcenter.kz сайтында немесе UTO мобильді қосымшасы арқылы беруге болады.
Өтініш беру тәртібі:
- 11–16 сәуір аралығында — өтінішті бір рет беруге болады;
- 17–25 сәуір аралығында — қалаған жағдайда екінші рет тапсыру мүмкіндігі бар.
Тестілеудің өзі 10 мамырдан 10 шілдеге дейін өтеді.
ҰБТ форматы
2026 жылы ҰБТ форматы өзгеріссіз қалады. Талапкерлер бұрынғыдай үш міндетті пән және таңдау бойынша екі бейіндік пән тапсырады. Жалпы тапсырма саны — 120:
- 20 — Қазақстан тарихы;
- 10 — оқу сауаттылығы;
- 10 — математикалық сауаттылық;
- 40 — әр бейіндік пән бойынша.
ҰБТ-ның ең жоғары нәтижесі — 140 балл.
Тестілеу уақыты — 4 сағат (240 минут). Ерекше білім беру қажеттіліктері бар балалар үшін қосымша уақыт қарастырылған — 40 минут.
Талапкерлерге қолдау
Биыл Ұлттық тестілеу орталығы талапкерлерге мамандық пен білім беру бағдарламасын жеке ерекшеліктерін ескере отырып таңдауға көмектесетін edunavigator.kz кәсіби бағдарлау платформасын іске қосты.
ҰБТ-ға дайындық үшін сынақ тесттері мен қосымша материалдар да қолжетімді. Олардың ішінде:
- ұсынылатын әдебиеттер тізімі;
- 100 негізгі тарихи дата;
- информатика бойынша терминдер тізімі;
- қазақ және орыс әдебиеті бойынша міндетті шығармалар.
Сондай-ақ тестілеу кезінде барлық қатысушыларға калькулятор, химиялық элементтердің периодтық кестесі және тұздардың ерігіштік кестесі қолжетімді болады. Орталықтың атап өтуінше, бұл ҰБТ тапсыру үшін неғұрлым объективті әрі қолайлы жағдай жасауға мүмкіндік береді.
Бұған дейін наурыз айындағы ҰБТ-2026 кезінде жүздеген талапкердің тестілеуден шеттетілгені айтылған. Кең тараған себептердің қатарында смартфондар мен шпаргалкалар сияқты тыйым салынған заттарды алып кіруге әрекеттену, сондай-ақ емтихан кезіндегі ережелерді бұзу көрсетілген.
Сондай-ақ: 85 жастағы талапкер ҰБТ тапсыра алмады, бірақ келесі жылы қайта келуге уәде берді.
